Andri Ragettli è il mister slopestyle. En questa disciplina è el vegnì ad Aspen en ils Stadis Unids campiun mundial il 2021. Plinavant ha el gudagnà en il slopestyle duas giadas aur als X-Games e 10 concurrenzas da la cuppa mundiala. I manca pia sulet anc ina medaglia olimpica. Il 2022 a Peking, quai suenter ina greva blessura, ha el manchentà questa medaglia sco quart be per pauc.
Andri Ragettli enconusch’ins era tar Real Madrid
Il star da freeski da Flem n’è dentant betg sulet enconuschent per sias prestaziuns sin pista, mabain era pervia da ses clips da video ch’el metta adina puspè sin ses chanals da social media. Savens èsi filmins che mussan el vid far in parcours spectacular sur ballas e trampolins en ina halla. Tar TikTok ha el gia passa dus milliuns followers ed er tar Instagram è quai passa 600’000.
Andri Ragettli è er enconuschent sco grond fan da Real Madrid, en emprima lingia pervia da Cristiano Ronaldo ch’ha giugà durant nov onns tar Real. El saja insumma in grond fan dals megliers dals megliers, uschia Ragettli. Dasper Ronaldo è quai cunzunt Shaun White, traidubel campiun olimpic da snowboard en la mesapipa, Kobe Bryant, anteriur star da basket tar ils Los Angeles Lakers u Roger Federer. Tut quellas persunas inspireschian fitg el. Ma Andri Ragettli è er sez per blers ina gronda inspiraziun. Uschia retschaiva el er in mantun posta da fans, posta che sia mamma sortescha e respunda.
Senza «challenges» na vai betg
Il sportist da 25 onns tschertga er adina novas sfidas. Durant il temp da corona è Andri Ragettli tranter auter er currì ina giada 100 kilometers, quai en bun 10 uras. Suenter la carriera saja il giavisch da currer ina giada 100 miglias, munta 160 kilometers. Ed ina giada ha el er prendì durant mes’ura in bogn da glatsch en il Lag la Cauma a Flem.
Per tut quai ch’el haja gia pudì e dastgà far, e per tut quai ch’el haja cuntanschì fin oz, saja el fitg engraziaivel, ha Andri Ragettli ditg a l’ur dal Laax Open. Mo el saja in che guardia enavant ed haja anc blers siemis e bleras visiuns.
Il 2022 ha Andri Ragettli er dà ora ses emprim cudesch, sia emprima biografia cun il titel «Attack your dreams».