19-12-2024
Swiss League: Cuira resta senza puncts cunter Olten
La squadra d'Olten n'ha betg sfarlattà temp e fa squitsch: be 5 minutas suenter ch'il gieu ha cumenzà fan ils dad Olten l'emprim gol. Mischa Bleiker po dentant gulivar per Cuira sin 1:1 anc avant l'emprima pausa. Pervia da flaivlezzas en la defensiun da Cuira suanda en la 24avla minuta il 1:2 per Olten. En il davos terz gulivescha Darels Dukurs per Cuira sin 2:2, grazia ad in powerplay nizzegià suenter be 8 secundas. Stgars duas minutas suenter va Olten dentant puspè en avantatg. Cun prender ora ses goli survegn Cuira en la davosa minuta lur anc in ulteriur gol – e perda la finala il gieu cun 2:4. Cun questa terrada perda Cuira in plaz e sa chatta da nov sin rang 8 da la tabella, gist anc sur il stritg.
18-12-2024
My Hockey League: Victoria per Arosa cunter Wetzikon
L'EHC Arosa ha pudì decider l'ultima partida da chasa avant la midada da l'onn cunter Wetzikon per sa sez cun 3:1. Be 42 secundas suenter ch'il gieu ha cumanzà fa Zwissler l'emprim gol per Arosa. A la fin da l'emprim terz po la squadra da la Part Sura Turitgaisa dentant gulivar sin 1:1. Durant il segund terz fa nagina da las squadras in gol. En il davos terz segirescha l'EHC Arosa sia victoria cun dus ulteriurs gols – in da Tosio (54'57'') ed il davos tras Bedolla (59'14''). Cunquai sa chatta Arosa sin il rang provisoric 5.
17-12-2024
Swiss League: Cuira perda cleramain cunter Basilea
Schegea ch'ils da Cuira han mussà ina prestaziun solida han ils da Basilea – che sa chatta provisoricamain sin il rang 1 – gia creà en il prim terz in avantatg grazia ad in gol dubel entaifer mo ina minuta. Durant il segund terz po Darels Dukurs far il prim e sulet gol per Cuira. Grazia a quel finescha il segund terz cun in pari dad 1:1. En il davos terz nizzegian ils da Basilea meglier sias schanzas e pon far 2 ulteriurs gols. Uschia va il gieu a fin cun in cler 5:1 per l'EHC Basilea. Cuira resta tuttina provisoricamain sin il rang 7.
14-12-2024
Swiss League: Cuira perda ordaifer
Encunter Sierre hai dà in gieu cun paucs gol. Sulet en il segund terz ha mintg'equipa pudì tutgar il gol da tschels ina giada. Perquai ha la prolungaziun decis il gieu. L'equipa da chasa ha nizzegià la schanza d'in powerplay ed ha fatg il gol decisiv per il 1:2 ord vista dal club grischun.
My Hockey League: Arosa gudogna cunter HC Franches-Montagnes
En la terzauta liga da la Svizra ha il club da hockey d'Arosa gudagnà ordaifer encunter il HC Franches-Montagnes dal chantun Giura. Quai cun 3:2 suenter prolungaziun. Tant en l'emprim sco en il terz terz han omaduas equipas mintgamai sajettà in gol. En la prolungaziun ha lura Yanik Lichtensteiger be duvrà 25 secundas per far il gol decisiv.
2. liga: San Murezzan gudogna era oz
Il club da l'Engiadina batta il SC Weinfelden gist cun 7:1. Nagin cletg ha percunter gì la segund'equipa da l'Engiadina en la segunda liga. Il CDH Engiadina perda a chasa encunter l'EHC Uzwil cun 0:4. Gia en la terza minuta hai da l'emprim gol per ils giasts e suenter la mesadad dal gieu è il resultat stà fix.
Lai Valbella ha era dà questa saira – encunter ils urs polars da Son Gagl. Grazia ad in gol da Luca Infanger en la prolungaziun ha il club grischun battì ils Songagliais cun 5:4 ordaifer.
1. liga: HC Partenz-Signuradi perda suenter penalties
Ils Red Lions Reinach han gì meglra fortuna en il shootout e tutgà il gol duas giadas per il resultat final da 2:3 ord vista dal club da chasa.
11-12-2024
2. liga: Puspè San Murezzan
Il derby engiadinais da la mesemna saira en la halla Gurlaina a Scuol va a fin cun ina victoria per San Murezzan. Ils indigens dal Cdh Engiadina han la finala pers cunter l'EHC San Murezzan cun 3:4. Uschia resta il titel da «retg da hockey» en la vallada tar San Murezzan.
Suenter dus terzs era la partida anc pari 1:1. Lura è l’emprim San Murezzan stà en avantatg, il Cdh Engiadina ha dentant reagì e da sia vart manà cun in gol avantatg. La finala ha San Murezzan tuttina anc dumagnà da marcar dus gols, il gol decisiv al 4:3 è crudà en la 54avla minuta.
My Hockey League: Arosa fa trais puncts
Cunter il segund davos da la tabella gudogna Arosa cun 5:3. Suenter 15 minutas eran ils Grischuns cun 2:0 en avantatg, avant l'emprima pausa vegn Frauenfeld dentant anc da scursanir. E mintga giada che Arosa sajetta suenter in gol, vegn il club da la Turgovia puspè da scursanir sin mo in gol differenza – quai fin al 4:3 en la 49avla minuta. Decidì la partida ha Arosa lura pir var 100 secundas avant la fin, cura ch'ils giasts han prendì or dal gieu lur goli.
10-12-2024
Swiss League: Cuira perda a chasa
La decisiun è crudada en la prolungaziun, e quai en favur da l'adversari da Winterthur cun 2:1. Ils aspectaturs e las aspectaturas han dentant stuì spetgar ditg sin l'emprim gol en questa partida. Ils dus emprims terzs n'hai numnadamain dà nagins gols. Strusch ch'il davos terz ha gì cumenzà, ha Winterthur marcà. Cuira ha lura pir pudì egualisar en la 57avla minuta. Cun il resultat dad 1:1 suenter il temp regular, hai duvrà ina prolungaziun. Ed en quella ha Winterthur sajettà il gol decisiv.
08-12-2024
Swiss League: Cuira cun in 5:4 cunter Visp
Cunter l'EHC Visp ha Cuira stuì sa cuntentar cun in pari suenter il temp regular. En la prolungaziun n'èsi betg gartegià a las squadras da far in gol. Perquai han ils penaltis stuì decider. La finala ha Cuira gudagnà cun 5:4. L'EHC Cuira è cunquai sin il setavel plaz, quai èn duas posiziuns sur il stritg.
07-12-2024
Senza puncts turna l'EHC Lai-Valbella da la partida ordaifer cunter il SC Weinfelden. Malgrà ch'ils Grischuns han fatg l'emprim gol ha l'equipa da segunda liga pers la partida cun 1:3. En il segund terzs ha Weinfelden gist fatg trais gols. Lai-Valbella è sin plazza quatter en la tabella.
06-12-2024
Swiss League: Cuira gudogna ordaifer cunter GCK Lions
Ordaifer cunterter ils GCK Lions ha l'EHC Cuira gudagnà cun 4:2. Gia en l'emprim terz eran ils da Cuira enavant cun 2:1. Questa differnza n'ha l'adversari da Turitg betg pudì far bun. Ils gols per l'EHC han fatg Emilijus Krakauskas, Fabian Eggenberger e Darels Dukurs (dus gols). En la tabella è Cuira uss sin plazza set.
04-12-2024
1. liga: Partenz perda cunter l'EHC Turgovia Sura
Il HC Partenz-Signuardi han pers 2:1 cunter ils Pikes da la Turgovia Sura. Durant l'emprim terz ha l'EHC Turgovia Sura pudì far l'emprim gol. En il segund terz èsi gartegià als da Partenz-Signuardi da gulivar sin 1:1. Il gieu è la finala vegnì prolungà ed ils da la Turgovia han fatg in ulteriur gol.
03-12-24
Swiss League: Cuira gudogna cunter Bellinzona
Cuira ha gudagnà il gieu da chasa cunter ils Bellinzona Snakes a moda suverana. Tim Muggli dumagna da gia crear in avantatg da 2:0 per il team da Cuira durant l'emprim terz cun sajettar dus gols entaifer curt temp. Il gieu va a fin cun ina victoria meritada da 4:2. Cun questa victoria reussescha als da Cuira dapi daditg puspè il sigl sur il stritg sin il rang 8 da la tabella.
01-12-24
My Hockey League: Arosa batta Langenthal
A chasa gudogna l'EHC Arosa cler cunter il SC Langenthal cun 6:1. Tut ils trais terzs han dominà ils giugaders dal Scanvetg (2:0/3:1/1:0). Il Langenthal ha sulet pudì realisar il «gol d'onur» en il segund terz. Il rest dal temp han dominà ils giugaders d'Arosa.
30-11-2024
2. liga: victoria per l'EHC San Murezzan
Il club da hockey da San Murezzan ha nizzegià l'avantatg da chasa e laschà nagina schanza al HC Eisbären Son Gagl. Ils Engiadinais han battì ils Songaglias cun 8:0. Mess la basa per questa victoria ha San Murezzan gia en l'emprim terz cun gist quatter gols. En il segund e terz terz hai alura anc ina giada dà mintgamai dus gols.
2. liga: Lai-Valbella gudogna derbi grischun
Il derbi grischun tranter Lai-Valbella ed il club da hockey Engiadina ha gudagnà Lai-Valbella cun 6:4. Fin a la fin dal segund terz è la partida tranter ils dus clubs grischuns stada gulivada cun 3:3. En il davos terz ha Lai-Valbella lura entant pudì mobilisar dapli energia e gudagnà il terz cun 3:1, uschia ch'igl è fin la fin stada ina chaussa clera per Lai-Valbella.
1. liga: terrada per Partenz Signuradi
Suenter la victoria d'avant trais dis cunter ils Red Lions Reinach, ha il club da hockey dal Partenz Signuradi da magunar ina terrada. Ils Grischuns han pers cunter ils Argovia Stars cun 2:3. Fin a la fin dal segund terz è la partida stada gulivada. Ils dus clubs èn ids en la segunda pausa cun in pari da 1:1. En il davos terz èn ils Argovians lura entant stads memia ferms per ils Grischuns.
Swiss League: Cuira gudogna cunter Turgovia
L'EHC Cuira ha gudagnà cunter il HC Turgovia a chasa cun 3:2. Suenter il segund terz han ils Turgovians anc manà cun 2:1. La pausa han ils Grischuns lura entant nizzegià per tancar energia, els han anc ina giada prendì schlantsch e defendì bain lur gol en il terz terz. Quel ha l'EHC Cuira lura era gudagnà cun 2:0 uschia ch'i ha bastà per la victoria.
27-11-2024
My Hockey League: Arosa batta Bülach
L'EHC Arosa ha incassà ordaifer ina terrada da 4:2 cunter Bülach. Ils Grischuns avevan lantschà bain la partida cun ir en avantatg cun 2:0 en il segund terz. L'EHC Bülach ha dentant pudì reagir ed ha egualisà la partida e la finala battì Arosa. Suenter questa partida è Arosa sin plazza 6, l'adversari da Bülach è sut il stritg.
26-11-2024
Swiss League: Cuira perda cunter la Chaux-de-Fonds
Ordaifer ha Cuira pers cunter la Chaux-de-Fonds cun 2:3 suenter sajettar penaltis. Igl aveva anc cumenzà bain per ils Grischuns. Suenter l'emprim terz stevi 1:0 per Cuira, dentant han ils romands lura sajettà dus gols en il segund terz e Cuira in gol, uschia ch'i steva pari 2:2. L'ultim terz n'èn crudads nagins gols ed er en la prolungaziun n'è sin omaduas varts capità nagut. La fortuna tar il sajettar penalti è lura la finala stà sin la vart dals romands. En la tabella maina la Chaux-de-Fonds e Cuira è sut il stritg sin plazza 9.
23-11-2024
Swiss League: terrada per Cuira
Per Cuira n'hai la sonda saira betg propi vulì. Ordaifer han els pers cunter Olten cun 0:6 . En l'emprim terz steva la partida anc pari 0:0, dentant en il segund terz han ils da Cuira lura gist incassà 4 gols. Igl n'è betg pli gartegià ad els da volver il gieu, uschia che Olten ha er anc l'ultim terz fatg dus ulteriurs gols. En la tabella è Cuira actualmain sin plazza 9, il segund davos plaz da la tabella.
MyHockey League: victoria per Arosa
Il club da hockey d' Arosa ha pudì festivar ina victoria ordaifer cunter Huttwil cun 4:2 . Fin la 28avla minuta n'èn anc crudads nagins gols. Lura dentant hai dà l'emprim gol per Huttwil. 4 minutas pli tard han ils d'Arosa dentant puspè pudì egualisar ed anc ina giada 4 minutas pli tard ids cun in 2:1 en avantatg. Ed er l'ultim terz ha cumenzà cun in gol d'Arosa. Suenter hai lura mintgamai anc dà in gol ch'ha lura manà a la victoria per Arosa. En la tabella è Arosa actualmain sin plazza 6.
1. liga: terrada per il Partenz-Signuradi
Il Partenz-Signuradi ha pers ordaifer cunter Wil cun 3:6 . Suenter l'emprim terz stevi anc pari 2:2, dentant han ils da Wil lura dominà en il segund terz cun ulteriurs 2 gols ed er en l'ultim terz hani anc ina giada sajettà dus gols. Il gol curt avant la fin per Partenz-Signuradi n'ha lura betg pli tanschì per pudair volver il gieu. En la tabella è il Partenz-Signuradi actualmain sin plazza 6.
2. liga: terrada per il CDH Engiadina
Ordaifer ha il club da hockey d'Engiadina pers cunter ils Dürnten Vikings cun 0:2 . Fin las ultimas minutas avant la fin da l'ultim terz n'èn crudads nagins gols. En la 54avla minuta han lura dentant ils da Dürnten fatg lur emprim gol ed en la 58avla gist anc lur segund. En la tabella è il CDH Engiadina actualmain sin plazza 5.
2. liga: victoria per San Murezzan
Ordaifer ha il club da hockey da San Murezzan gudagnà cunter Kreuzlingen-Konstanz cun 4:1 . L'emprim gol ha San Murezzan sajettà curt avant la fin da l'emprim terz. En il segund terz èn lura gist suandads dus ulteriurs gols per San Murezzan. Els han dominà il gieu fin la fin, era sche ils da Kreuzlingen-Konstanz han anc pudì sajettar in gol en l'ultim terz. En la tabella è San Murezzan actualmain sin plazza 7.
2. liga: victoria per Lai-Valbella
Ed er Lai-Valbella ha giugà ordaifer la sonda saira e battì ils Glarner EC cun 6:3 . Suenter l'emprim terz han ils Glarunais anc manà il gieu cun 2:1. Dentant ha Lai-Valbella en ils segund terz pudì egualisar, uschia ch'i steva suenter dus terzs 3:3. En l'ultim terz ha Lai-Valbella lura dominà ed anc sajettà trais gols. En la tabella èn ils Grischuns actualmain sin plazza 4.
20-11-2024
Arosa gudogna ordaifer cunter Wetzikon 5:1
En il prim terz n'eri anc betg cler nua ch'il viadi va. Omadus equipas han pudi far in gol. Lura è suandà il segund terz, insumma senza gols. En l'ultim terz ha Arosa però dominà e fatg a quatter gols a partir da la 45avla minuta, l'ultim gol en la davosa minuta. Suenter duas terradas, pia puspè ina vicotira per Arosa che sa chatta actualmain sin il sisavel plaz da la tabella.
Clera victoria a chasa per San Murezzan
San Murezzan ha battì Glaruna cun 8:4. Cumenzà han ils Engiadinais cun il prim gol suenter otg minutas. Glaruna ha lura però gist egualisà en la 10avla minuta ed anc pudì far in segund gol en la 15avla minuta. Er il segund terz ha cumenza meglier per ils Glarunais che per San Murezzan. Els han numnadamain fatg il 3:1 en la 21avla minuta. Lura hai però midà e San Murezzan ha fatg anc trais gols en en il segud terz. Ed er l'ultim terz han ils Engiadinais lura dominà e fatg quatter ulteiurs gols. Curt avant la fin ha Glaruna lura anc dumagnà il 4:8 en la 56avla minuta. Ina victoria che fa segir bain als Engiadinais. Suenter ina seria da terradas sa chattan els actualmain sin l'otgavel plaz da la tabella.
19-11-2024
Partenz-Signuradi perda suenter penaltis cun 4:3 cunter Herisau
Malgrà ina buna prestaziun n'hai betg tanschì per ils Grischuns en la prima liga da realisar in'ulteriura victoria a chasa. Curt avant la fin dal prim terz han ils Appenzellais fatg il 1:0. Uschia hai cuntinuà en il segund terz nua che Herisau ha fatg il 2:0 en ina situaziun da powerplay. Però curt avant la pausa dal il segund terz ha il club Grischun pudì far il prim gol. Tuttina ha Herisau pudì far il 3:1 anc avant la pausa. En l'ultim terz ha Partenz-Signuradi dà tut e pudì egualisar sin il 3:3 uschia ch'igl ha gì num, sajettar penaltis suenter la prolungaziun. Qua è il cletg stà sin la vart da Herisau uschia ch'ils giasts èn turnads a chasa cun ina victoria (4:3).
Ulteriura victoria per Cuira
En la segund auta liga ha Cuira battì a chasa Basilea cun 4:2 . En l'emprim terz n'hai dà nagins gols. En il segund han lura ils giasts da Basilea dà en il tun ed en ids en avantatg cun gist dus gols entaifer ina minuta. A la fin dal segund terz ha Cuira lura anc pudì scursanir il retard e far il 1:2. L'ultim terz è stà en ils mauns da Cuira cun il 2:2 en la 45avla minuta, il 3:2 en la 48avla e la finala il 4:2 en la 58avla minuta. Tut en tut in gieu pulit gulivà almain dals sajets sin e dasper il gol in da l'auter cun 29 sajets sin il gol per Cuira e 26 per Basilea.
17-11-2024
Swiss League – victoria per Cuira
Cuira batta a chasa Sierre cun 6:5 . En in gieu intensiv va Cuira gia baud en avantatg. Ma ils osps vegnan da volver il gieu en il segund terz. Uschia cumenza l'ultim terz per Cuira cun dischavantatg – 3:4. L'equipa grischuna reussescha cun trais gols en seria da puspè volver il gieu ed ir cun 6:4 en avantatg. Sierre emprova tut en la fasa finala e pren pliras giadas ora il goli, quai basta dentant be anc per scursani il resultat ed els ston turnar trumpads en il Vallais.
16-11-2024
My Hockey League
Arosa perda a chasa cunter Thun 1:2 suenter prolungaziun. En il temp regular n'han ni Arosa ni Thun pudì sajettar in gol decisiv. Be en il segund terz ha mintga equipa pudì tutgar ina giada. En la prolungaziun po Thun lura sajettar il gol decisiv.
Emprima liga – Partenz-Signuradi gudogna
A chasa gudogna Partenz-Signuradi la partida cunter Wallisellen cun 2:1 . Il gieu cumenza guliv e senza gols en l'emprim terz. En il segund terz pon ils Grischuns ir en avantatg ma ils Turitgais vegnan dad egualisar curt suenter. En la 45avla minuta po Partenz-Signuradi lura ir en avantatg 2:1 e defender il resultat fin il tschivel final.
Segunda liga
Lai-Valbella perda ordaifer cunter Küsnacht cun 1:2 . Ils Turitgais pon ir en avantatg en l'emprim terz ed augmentar l'avantatg en l'ultim terz. Duas minutas avant la fin pon ils Grischuns anc scursanir, ma la fin resta la sconfitta.
Il Club da Hockey Engiadina gudogna a chasa cunter il HC Eisbären St. Gallen 2:1 .
San Murezzan perda ordaifer cunter Uzwil cun 2:3 . Il gieu è stà guliv curt avant la fin. Ils Engiadinais èn ids duas giadas en avantatg ed Uzwil ha duas giadas egualisà. Tschintg secundas avant la fin ha dentant Uzwil sajettà il 3:2 ed uschia decidì il gieu per sai. Ils Engiadinais restan uschia vinavant a la cua da la tabella.
15-11-2024
Swiss League – terrada per Cuira
Ordaifer perda Cuira cunter Wintertur 3:5. Cuira cumenza bain e maina suenter l'emprim terz cun 3:1. En il segund terz ha l'equipa da chasa dentant sajettà il gol da connexiun ed en l'ultim terz ha Wintertur gist tutgà trais giadas il gol.
13-11-2024
Segunda liga
Il club da hockey Lai-Valbella ha gudagnà cleramain la partida da chasa cunter l'EHC Uzwil cun 9:4. Gia suenter l'emprima partida han ils da Lai-Valbella gì in avantatg da 4:0. La segunda partida era pli gulivada. Omadus clubs han rimnà 2 puncts. Il davos terz ha l'EHC Lai-Valbella anc sajettà 3 ulteriurs gols – ils d'Uzwil mo pli dus.
10-11-2024
Swiss League
Cunter il 5avel da la tabella Visp ha Cuira pers a chasa cun 3:4 suenter sajettar penaltis. 3 giadas è Cuira ì en avantatg. 3 giadas ha Visp egualisà, l'ultima giada pir en la 59avla minuta. En la prolungaziun n'hai dà nagins gols, uschia che la lutga da penaltis ha stuì decider e quella han ils Vallesans decidì per els.
09-11-2024
Emprima liga
Ordaifer ha Partenz/Signuradi realisà ina victoria da 4:3 cunter l'SC Rheintal.
Segunda liga
Il club da hockey Engiadina ha gudagnà la partida da chasa cunter il Glarner EC cun 5:4. Suenter dus terzs eran ils Engiadinais anc cun 1:3 en retard. Il davos terz hani pero anc sajettà 4 gols – ils Glarunais mo pli in.
Lai-Valbella ha gudagnà ordaifer cunter Kreuzlingen-Konstanz cun 3:0.
06.11.2024
My Hockey League
Arosa ha pers ordaifer cunter Dübendorf cun 1:4. La fin d’emna passada avevan ils Grischuns anc battì Martigny ch’è a la testa da la tabella. Malgrà questa terrada resta il club dal Scanvetg sin plazza sis da la tabella.
02-11-2024
Swiss League
L'EHC Cuira è stà la sonda giast tar il terz da la tabella, il HC Turgovia. Il club da la chapitala è dentant turnà a chasa cun mauns vits, vul dir senza far in soli gol ed in soli punct. L'emprim terz n'hai anc dà nagins gols. Curt suenter la pausa ha Turgovia lura marcà l'emprim gol, e dus ulteriurs èn suandads fin a la 40avla minuta. Il davos gol en la 47avla minuta ha fatg clera la proxima terrada per l'EHC Cuira.
My Hockey League
Ina bella prestaziun ha l'EHC Arosa mussà la sonda saira, cun batter il cler leader dal classament Martigny cun 2:1. Curt suenter che Martigny ha marcà en la 9avla minuta, han ils dad Arosa pudì nizzegiar in chasti dubel cunter il club vallesan ed egualisar al 1:1. Il gol da victoria per Arosa ha Alessandro Togni lura fatg en la 27avla minuta. Bain ha Martigny dà las duas davosas minutas senza goli, questa mesira n'ha dentant midà nagut vi dal resultat en favur dad Arosa.
1. liga
Cun fadia ha il HC Partenz-Signuradi gudagnà la partida cunter Lucerna cun 3:2, decidì ha la finala numnadamain il sajettar penaltis. Duas giadas è Partenz stà en avantatg, ed il 2:1 marcà en la 32avla minuta ha tegnì fin 3 minutas avant la fin. Lura ha Lucerna anc pudì egualisar al 2:2. Damai che la prolungaziun n'ha purtà nagina decisiun, è suandà il sajettar penaltis. E là ha Curdin Lampert fatg il gol decisiv per ils Grischuns.
2. liga
Il derby grischun tranter l'EHC San Murezzan e l'EHC Lai-Valbella po il club dal Grischun Central decider en sia favur, quai cun 4:3. Suenter l'emprim terz steva la partida pari 1:1, lura è San Murezzan vegnì in pau sut las rodas. Tranter la 31avla e la 39avla minuta ha Lai-Valbella marcà trais giadas, uschia ch'i steva suenter dus terzs 1:4 per ils giasts. Bain ha Marc Camichel anc sajettar dus gols per San Murezzan al cumenzament dal davos terz. Quai n'ha però betg tanschì per volver il gieu. Er il tric da San Murezzan da prender ora il goli las duas davosas minutas è questa giada restà senza effect.
Er il segund club engiadinais sto magunar ina terrada questa sonda. Il Cdh Engiadina ha pers a chasa cunter Küsnacht cun 2:3 suenter prolungaziun. Il gol decisiv ha Küsnacht sajettà suener ina minuta e 47 secundas da la prolungaziun. En il temp regular da la partida è il Cdh Engiadina stà duas giadas en avantatg, mintgamai han ils Engiadinais dentant suenter paucas minutas puspè incassà in gol.
31-10-2024
Swiss League
Ulteriura terrada per l’EHC Cuira. Cunter La Chaux-de-Fonds han il hockeyans da Cuira pers lur gieu da chasa cun 2:3. Il gieu aveva cumenzà bain per Cuira. A la fin da l’emprim terz manavan ils Grischuns cun 2:0. En il segund terz n’hai dà nagins gols, ma en il davos terz ha La Chaux-de-Fonds l’emprim egualisà e gnanc duas minutas avant la fin er anc sajettà il gol da la victoria.
30-10-2024
My Hockey League
L’EHC Arosa ha gudagnà ses gieu da chasa cunter Frauenfeld cun 3:2 suenter sajettar penaltis. Enfin 6 minutas avant la fin manava Arosa cun 2:0, ma lura ha Frauenfeld anc pudì egualisar. En la prolungaziun n’hai dà nagins gols, uschia che la lutga da penaltis ha stuì decider e quella è stada en favur d’Arosa.
29-10-2024
Swiss League
Ins pudess copiar il text d'avant dus dis. Il club da Cuira na vegn era vinavant betg sin ina frastga verda en la segund auta liga da hockey da la Svizra. Gia en l'emprim terz dal gieu encunter Turitg ha Cuira cassà dus gols. Il gol da Timo Jenni en la 16avla minuta ha la finala era gidà nagut, en la 28avla minuta han ils GCK Lions decis il gieu cun in gol en powerplay.
Cuira resta cunquai sin plazza 9, sut il stritg cun 15 puncts or da 15 gieus.
27-10-2024
Swiss League
Il club da la chapitala grischuna na vegn betg propi sin ina frastga verda en la Swiss League. Encunter il EHC Olten perda Cuira cun 2:3 suenter penalties. Suenter 14 partidas ha il club 15 puncts. Quai munta il segund davos plaz en la tabella, gist sut il stritg. Cuira ha dus puncts retard sin l'otgavel, l'EHC Olten.
26-10-2024
My Hockey League
Arosa ha pudì festivar in'ulteriura victoria. Ils Grischuns gudognan encunter il SC Lyss cun 4:0. Tutgà per Arosa han Linus Haller, Denis Szczepaniec e duas giadas Gregory Bedolla.
1. liga
Gist cun 0:4 perda il HC Partenz-Signuradi a chasa encunter il EHC Burgdorf. Ils osps èn ids en avantatg suenter 10 minutas ed han en il terz terz pudì bajegiar ora quel cun dus gols en las duas davosas minutas dal gieu. Quai è l'emprim gieu che l'equipa Grischuna perda en questa stagiun, ils emprims dus gieus hani gudagnà, la terza partida è vegnida rutta giu perquai ch'il glatsch n'era betg segir per dar.
2. liga
Il EHC San Murezzan perda ordaifer cun 2:5 encunter il SC Küsnacht. Il club da Turitg è gia en la quarta minuta ì en avantatg, ils Engiadinais han dentant pudì equalisar en la 10avla minuta cun in gol da Harrison Koch – han dentant quatter minutas pli tard gia survegnì il 1:2.
En il segund terz ha Marc Camichel pudì egualisar anc ina giada per il 2:2. En la segunda part dal segund terz hai dentant dà 3 gols per l'equipa da chasa. Ed en il terz terz ha ni l'ina ni l'autra equipa pli pudì sajettar in gol.
Meglier ha dà il segund club da l'Engiadina, il CdH Engiadina gudogna ordaifer cun 4:0 encunter EHC Kreuzlingen-Konstanz. Sandro Salis ha cumenzà cun il 1:0 en la 18avla minuta, silsuenter ha Fabrizio Mayolani tutgà en il segund terz ed en il davos terz han Dario Schmidt e Men Camichel cementà la victoria.
Nagin success ha percunter gì l'equipa da Lai-Valbella. Els perdan a chasa encunter l'EHC Dürnten Vikings cun 2:5. Ils emprims dus terzs èn stads gulivads, cun gols per omaduas equipas. Per en il terz terz han ils osps dominà il gieu e sajettà ils davos dus gols.
24-10-2024
Swiss League: Cuira sto magunar in'ulteriura terrada
L'EHC Cuira ha pers ordaifer cunter ils Bellinzona Snakes cun 3:4. Suenter l'emprim terz stevi anc pari 1:1. Durant il segund terz ha lura Benjamin Bonvin fatg in ulteriur gol per Bellinzona e Cuira era en retard cun 1:2. En l'ultim terz hai lura anc dà per omaduas equipas mintgamai dus gols. Cuira è actualmain sin il segund davos plaz da la tabella ed ils Bellinzona Snakes è il Gion davos.
23-10-2024
My Hockey League: Arosa po festivar ina victoria
L'EHC Arosa ha gudagnà la partida a chasa cunter l'EHC Seewen cun 2:1 suenter sajettar penaltis. Suenter trais terz e la prolungaziun stevi anc adina 1:1. L'emprim gol per Arosa ha Matteo Tedoldi fatg en l'emprim terz, en la 5avla minuta.
22-10-2024
Swiss League: ulteriura terrada per l'EHC Cuira
L'EHC Cuira ha pers la partida cunter l'EHC Basel cun 3:4. Suenter il segund terz manava l'equipa grischuna anc cun 3:2. Durant il davos terz ha l'EHC Basel dentant fatg anc 2 gols, in en la 47avla ed in en la 57avla minuta.
19-10-2024
My Hockey League: sconfitta clera per l’EHC Arosa
Il club da hockey d’Arosa ha pers ordaifer cun 9:2 cunter il EHC Thun. Surtut en il segund terz han ils dad Arosa mussà ina prestaziun nauscha. Tschintg gols ha Thun pudì far en quel.
Swiss League – sconfitta dolurusa per EHC Cuira
Il gieu dad questa sonda vulan quels da Cuira probablamain emblidar uschè svelt sco pussibel. L'EHC Cuira perda ordaifer cun 11:4 cunter il HC Sierre dal Vallais. Sierre tutga tar las meglras squadras en la Swiss League.
2. liga – Lai-Valbella gudogna, Engiadinais perdan
En la segunda liga perda l'EHC San Murezzan cun 2:3 cunter l'SC Weinfelden. Ed er il Cdh Engiadina perda ses gieu, numnadamain cun 1:3 cunter il EHC Uzwil. Lai-Valbella gudogna percunter cun 6:2 cunter ils HC Eisbären Son Gagl.
12-10-2024
Swiss League – terza victoria en fila per Cuira
Ils Grischunas han battì a chasa l’EHC Winterthur cun 3:1. Suenter las victorias cunter il HC Thurgau e l’EHC Visp vuleva l’EHC Cuira uss er gudagnar cunter Winterthur. Suenter l’emprim terz èn las duas squadras idas senza gol en la pausa. En la 29avla minuta è l’EHC Cuira lura ì en avantatg cun 1:0. Be 39 secundas suenter hai dà il segund gol per ils Grischuns. En la 50avla minuta ha l’EHC Winterthur sajettà ses emprim gol. Trais minutas avant la fin da la partida hai lura anc dà il terz gol sin il conto da Cuira.
1. liga – rusna en il glatsch ha impedì il gieu
La partida tranter ils Red Lions Reinach ed il club da hockey da Partenz-Signuradi ha stuì vegnir rutta giu suenter 38 minutas. La segirtad dals giugaders na saja betg stada dada, pervi d'ina rusna en il glatsch. L'equipa da Reinach manava cun 4:2. La federaziun da hockey sin glatsch decidia ils proxims dis co quest gieu vegn valità, pon ins leger sin la pagina dal club da Partenz-Signuradi. Dad ina victoria forfait per il club grischun enfin ina repetiziun dal gieu saja tut pussaivel.
2. liga – ina victoria ed ina terrada
Il Club da hockey Engiadina ha gudagnà a chasa il derbi grischun cunter l’EHC Lai Valbella cun 5:3. L’EHC San Murezzan percunter ha pers ordaifer cunter il HC Eisbären St. Gallen cun 1:3.
09-10-2024
My Hockey League: Clera victoria per l’EHC Arosa
Il club da hockey d’Arosa ha gudagnà l’8avel gieu da la stagiun cunter l’EHC Bülach cun 5:1. Cunter il segund davos da la tabella n’èsi betg reussì als Grischuns da sajettar in gol en l’emprim terz. Pir en la 21avla minuta ha Denis Szucezepaniec sajettà l’ 1:0. A la fin è la victoria dentant tuttina stada clera.
08-10-2024
Swiss League – Cuira gudogna ordaifer cunter Visp
Il club da hockey da Cuira ha realisà ina victoria ordaifer e battì Visp cun 4:3 suenter sajettar penaltis. Cun quels 2 puncts sa migliurà Cuira sin plazza 7 da la tabella.
05-10-2024
Swiss League – Cuira batta HC Thurgau 3:2
Cuira mussa davent da l'entschatta als osps da la Turgovia ch'els vulan gudagnar. Cun dus gols en l'emprim terz ed in ulteriur en il segund terz domineschan ils Grischuns il gieu. Il davos terz mida la partida tuttenina. Ils giugaders dal HC Thurgau fan squitsch. Survegnan uschia bain in pèr chastis, ma il quint va tuttina si ed els vegnan da sajettar dus gols. La finala è quai dentant in memia pauc ed ils Turgovians turnan a chasa senza puncts. Cun nov puncts en otg gieus po Cuira uschia sa tegnani gist sur il stritg sin plazza otg da la tabella.
My Hockey League – Arosa perda cunter Franches-Montagnes 1:4
Arosa perda a chasa cleramain il gieu cunter Franches-Montagnes. Ils emprims dus terzs è il gieu stà gulivà – igl ha dà in gol per vart. L'ultim terz è quai dentant sa midà. Franches-Montagnes ha fatg squitsch e sfundrà trais giadas il puck en il gol dals Grischuns.
1. liga – Partenz-Signuradi batta Argovia Stars 3:1
A chasa po Partenz-Signuradi mussar als Argovia Stars nua che las stailas pendan. Ils Grischuns incasseschan gia baud in cuntragol, ma gia duas minutas pli tard pon els egualisar. Il segund terz han els luras sut controlla il gieu e realiseschan il resultat final cun dus gols entaifer ina minuta.
2. liga – San Murezzan batta CDH Engiadina 4:3 suenter prolungaziun
Il derbi da hockey engiadinais finescha en favur da San Murezzan. Il CDH Engiadina ha pudì ir en avantatg gia en l'emprim terz cunter l'equipa da chasa ed augmentar en il segund terz sin 1:3. Ma en l'ultim terz ha San Murezzan pudì egualisar e decidì il gieu en la prolungaziun per sai.
2. liga – Lai-Valbella batta Kreuzlingen-Konstanz 4:0
A chasa mussa Lai Valbella in fulminant gieu. Ils Grischuns sajettan in gol suenter l'auter e tramettan ils osps enavos al Lai da Constanza cun ina detga terrada. Il gieu è stà fitg emoziunal cun 19 chastis – dus giugaders han schizunt stuì bandunar il glatsch perquai ch'els èn sa pitgads.
02-10-2024
MyHockey League – Arosa batta l'EHC Wetzikon cun 4:3
Curt avant la fin da l’emprim terz èn ils Turitgais ids en avantatg cun 1:0. Stgars diesch minutas suenter ch’il segund terz ha cumenzà han lura ils Grischuns pudì egualisar ad 1:1. Vers la fin dal segund terz hai dà entaifer gnanc dus minutas in gol per mintga squadra. En l’ultim terz ha lura l’EHC Arosa sajettà dus gols ed è ì en avantatg cun 4:2. Tschintg minutas avant la fin da la partida ha l’EHC Wetzikon lura anc pudì scursanir a 3:4. En la tabella è l’EHC Arosa actualmain sin il tschintgavel plaz.
01-10-2024
Swiss League – EHC Cuira turna a chasa cun ina terrada
La Chaux-de-Fonds – Cuira 4:3 : suenter prolungaziun.La partida aveva cumenzà bain per ils da Cuira. En la 12avla minuta han els sajettà l’emprim gol da la saira. Suenter ha lura l’adversari fatg trais gols. Als Grischuns èsi dentant gartegià d’egualisar la partida a 3:3 en la 54avla minuta. En la prolungaziun è lura il cletg stà da la vart da La Chaux-de-Fonds.
28-09-2024
2. liga – sconfitta per Cdh Engiadina
Weinfelden – Cdh Engiadina 5:4 : En la segunda liga il Club da Hockey d'Engiadina pers lur emprim gieu da la stagiun ordaifer cunter il SC Weinfelden – quai cun 4:5 suenter sajettar penaltis. Cumenzà avevi anc bain per ils Engiadinais. Suenter l'emprim terz stevi 3:0 per l'Engiadina. Dentant hani lura zunt l'ultim terz laschà suenter, uschia che ils giugaders da Weinfelden han pudì gulivar sin in 4:4. E cun sajettar penaltis è il cletg lura stà sin la vart dals Turgovians ch'han là fatg in gol dapli ch'ils Engiadinais.
San Murezzan – Dürnten Vikings 1:4 : Ed er il club da hockey da San Murezzan ha pers lur gieu a chasa cunter Dürnten Vikings cun 1:4. Gia en l'emprim terz han ils giasts cumenzà ferm cun gist 3 gols. Il segund terz ha San Murezzan lura anc pudì sajettar in gol, dentant n'han els betg pli pudì volver il gieu.
27-09-2024
Swiss League – Cuira perda bumbastic cunter GCK Lions
Quest gieu da chasa vul il EHC Cuira probabel emblidar uschè spert che pussibel. Cuira perda cun 1:7 cunter ils GCK Lions – e quai malgrà ch'els han sajettà 35 giadas sin il gol (GCK be 22 giadas). Gia suenter l'emprim terz stevi 0:2, en il segund terz han ils Turitgais fatg 4 ulteriurs gols, ed en il davos terz anc in. Set secundas avant la fin ha Dufey Hosselin anc pudì far il 1:7, uschia che Cuira ha almain fatg in gol.
25-09-2024
Swiss League – Il davos terz fa Arosa tut cler
Arosa – Dübendorf 8:4. Ditg è la partida tranter ils Grischuns ed ils Turitgais stada guliva. Bain ha Arosa manà suenter l'emprim terz cun dus gols. Curt suenter ch'il segund terz ha cumenzà ha Dübendorf dentant pudì egualisar. Ed uschia èsi ì vi e nà fin al cumenzament dal davos terz, cura che Arosa manava cun 4:3. Tranter la 44avla e la 48avla minuta ha Gregory Bedolla lura sajettà trais gols per Arosa. E cun il gol final da Maurin Tosio è la partida ida a fin cun in 8:4 en favur dad Arosa.
24-09-2024
Swiss League – In gol e nagins puncts per Cuira
Olten – Cuira 2:1. Quai è stà in duel tranter dus vischins da la tabella, e cun questa victoria ha Olten pudì surpassar Cuira. Cumenzà meglier la partida ha Olten, cun esser cun 1:0 en avantatg suenter l'emprim terz. En la 30avla minuta ha Charles Winter Koren lura pudì egualisar per Cuira. Ad Olten è il gol da la victoria al 2:1 dentant gartegià en la 45avla minuta.
21-09-2024
Swiss League – Cuira dumogna las serps
Cuira – Bellinzona Snakes 3:2 s. p. Suenter duas terradas è Cuira puspè sin buna via en la Swiss League. A chasa gudognan ils Grischuns cunter las serps da Bellinzona. Entant ch'ils Tessinais han pudì ir en avantatg gia suenter tschintg minutas ed eran davant cun 2:0 suenter l'emprim terz, ha Cuira dà gas en il segund terz ed en paucas minutas egualisà al 2:2. El temp regular n'hai lura betg pli dà gols. Pir en la prolungaziun ha Jan Zwissler lura sajettà Cuira a la victoria.
Swiss League – Arosa perda
Langenthal – Arosa 4:2. Arosa turna senza puncts enavos da Langenthal. Bain han ils Grischuns sajettà l'emprim gol da la partida. E ditg è il gieu stà gulivà. Anc duas minutas avant la fin eri 2:2. Ma lura en la 59avla minuta èn ils Bernais ids per l'emprima giada durant la partida en avantatg. L'ultima speranza dals Grischuns è stà da prender il goli or dal gol – ma quai han ils da Langenthal nizzegià e rinforzà la victoria a 4:2.
1. liga – victoria per Partenz-Signuradi
Bellinzona – Partenz-Signuradi 2:3 s.p. Il viadi en il Tessin ha rendì per Partenz-Signuradi. A Bellinzona han ils Grischuns dominà ditg il gieu e pudì martgar tant en l'emprim sco er en il segund terz mintgamai in gol. E l'agen è restà senza flatgs. En l'ultim terz è quai dentant sa midà. Bellinzona ha egualisà ed uschia sfurzà la prolungaziun. Là ha lura Yannick Bucher tutgà il gol ed uschia pon ils Grischuns turnar ventiraivels a chasa.
18-09-2024
Swiss League – victoria per Arosa
Frauenfeld – Arosa 2:3 . A Frauenfeld po Arosa persvader. La squadra indigena ha, en il segund terz, pudì ir en avantatg cun dus gols curt in suenter l'auter. Ma la reacziun d'Arosa n'ha betg laschà spetgar ditg. Anc en il segund terz han ils Grischuns pudì egualisar. Uschia èsi puspè stà tut avert per l'ultim terz. En lez ha Arosa lura anc ina giada sfundrà il puck en il gol da Frauenfeld ed uschia gudagnà il gieu.
17-09-2024
Swiss League – terrada per Cuira
Basilea – Cuira 6:2 . A Basilea na datti nagina victoria per Cuira. La squadra indigena va gia en l'emprim terz en avantatg e po augmentar quel en il segund terz sin 2:0. Cuira po dentant sa far si ed anc egualisar avant la segunda pausa. Uschia è tut avert en l'ultim terz. Ma bun tschintg minutas avant la fin po Basilea puspè ir en avantatg cun 3:2. Per anc avair ina schanza prenda Cuira curt avant la fin il goli giu dal glatsch. Ma quai va en las chautschas. Durant las ultimas duas minutas po Basilea anc sajettar trais giadas il puck en il gol dals da Cuira.
14-09-2024
Swiss League
L'EHC Cuira na po betg cuntinuar sia partenza victoriusa da venderdi saira. En lur segund gieu en la Swiss League han ils Grischuns pers 1:3 cunter il HC Sierre. Bain ha Cuira finì il segund terz cun in gol avantatg, dentant ha il giast ed adversari pudì egualisar en il davos terz, per lura far dus ulteriurs gols en las davosas minutas.
Swiss League
Per l'EHC Arosa ha la nova stagiun cumenzà cun ina terrada da 3:4 suenter prolungaziun a chasa cunter Huttwil. Durant il segund terz han ils Grischuns pudì egualisar ad in 2:2, il davos terz han omaduas equipas augmentà per in gol. La prolungaziun necessaria ha il giast Huttwil lura nizzegià per finir la partida cun ina victoria.
13-09-2024
L'EHC Cuira parta cun ina victoria en l’aventura Swiss League. Ordaifer ha Cuira battì Winterthur cun 2:0. Omadus gols ha sajettà il giuven Letton Darels Dukurs che giugava la stagiun passada anc tar ils SCL Tigers. L’emprim gol è gia crudà en la 6avla minuta. Il davos è stà in en il gol bandunà, curt avant la fin.