Il derbi da hockey engiadinais finescha en favur da San Murezzan. Suenter ch'il CDH Engiadina aveva dominà la partida durant bunamain 50 minutas, ha la squadra da l'Engiadin'Ota anc pudì egualisar il gieu curt avant las 60 minutas e decider il gieu en la prolungaziun per sai.
Prevista
Al cumenzament da mintga nov campiunadi cumenza la statistica puspè tar nulla ed uschia er ils gieus da derbi da hockey engiadinais. Mintga singul gieu dat a las squadras la schanza da puspè gudagnar.
Statistica pleda per San Murezzan
Sch'ins dat in sguard sin ils resultats da las ultimas stagiuns, alura pledan quels cleramain per San Murezzan. Durant las ultimas tschintg stagiuns ha l’equipa da l’Engiadina'Ota gudagnà da las en tut set partidas, tschintg gieus. Il CDH Engiadina ha gudagnà be dus gieus. In la stagiun passada e l’auter la stagiun 2021/2022. Avant mintga derbi vegnan las statisticas dentant messas da la vart. Ed il gieu cumenzà da nov. Tuttina ha la statistica ina tscherta influenza. Surtut per l’equipa ch’è sin quellas glistas a la testa.
Duel tranter duas equipas fitg giuvnas
Il duel da hockey engiadinais è era il duel tranter duas equipas fitg giuvnas. Tant la media da vegliadetgna da San Murezzan sco dal CDH Engiadina è tar radund 25 onns. En omaduas equipas giogan blers giuvens giugaders. Uss dependi dals giugaders rutinads che quels van cun bun exempel ordavant e mussan als giuvens pli bain pussibel la via en l’emprima equipa.