Quai che l'EHC Lai-Valbella ha mussà durant questa stagiun da hockey en segunda liga è stà fitg bun. L’equipa dal Grischun central ha terminà la qualificaziun sin plazza quatter. En ils playoffs è l’equipa avanzada fin en il mezfinal. Suenter che Lai-Valbella ha pers las emprimas duas partidas dal mezfinal cunter il SC Küsnacht èsi anc ina giada vegnì stretg. Suenter duas sconfittas ha l’equipa dal trenader Ivo Simeon pudì egualisar la seria da mezfinal ed uschia sfurzà ina tschintgavla partida decisiva, ina «finalissima». Pir lura ha Küsnacht pudì serrar il satg e far il pass en il final.
Fitg, fitg, pauc ha mancà
Gist en la seria da mezfinal ha l'EHC Lai-Valbella mussà bler caracter. Be uschia èsi stà pussaivel da turnar en la seria nua che l’equipa grischuna era cun 0:2 en retard. A la fin han dentant puspè decidì las chaussas pitschnas. Il trenader da l'EHC Lai-Valbella, Ivo Simeon, sto constatar che sia equipa è stada memia pauc effizienta. Vi da quai vul ins uss lavurar, per turnar la proxima stagiun anc pli ferm.
Fitg, fitg, fitg pauc ha mancà per vegnir en il final. Qua avain nus d'emprender.
Mussà ina stagiun fitg constanta
Davent da l’entschatta ha l'EHC Lai-Valbella giogà sin in nivel aut e mussà ina prestaziun fitg constanta. Sch'ina parida è ina giada ida a fin cun ina sconfitta, alura ha Lai-Valbella mussà ina reacziun gia en la proxima partida. Uschia èsi stà pussaivel da terminar la qualificaziun sin la buna quarta plazza e da partir en ils playoffs cun avantatg da chasa. L’emprima runda dals playoffs è lura stada ina chaussa clera per Lai-Valbella. L’equipa ha gudagnà cun 2:0 la seria cunter Weinfelden. Era la seria da mezfinal encunter Küsnacht è stada fin a la fin averta. Quai dat curaschi e mussa che l’equipa ha fatg durant la stagiun – ch’è ida a fin – bler andretg.
