La sfida da chattar commembers che sa participeschian activamain en las societads na saja betg nova. La mancanza da glieud che fa part en uniuns pericliteschia il surviver da quellas.
Ozendi na vulan ils giuvens forsa betg pli far sport, els èn gugent a chasa davant las consolas da gieus.
Chattar novs giugaders cun agid da las medias socialas
Il club da hockey La Plaiv vul svegliar l’interess dals giuvens cun far reclama sin las medias socialas. Il club spera da recrutar cun questa strategia dapli hockeyans er cun il sustegn dals commembers activs.
Sfidas enconuschentas er tar auters
Il futur president dal club, Cla Duri Godly, tema che senza dapli – e preferabelmain giuvens – giugaders possia il Club da Hockey La Plaiv mo pli giugar las proximas duas fin trais stagiuns en il campiunadi da terza liga. A la terza liga fan actualmain ils suandants clubs da hockey part: EHC Samedan, HC Bregaglia, HC Poschiavo, CdH La Plaiv, HC Zernez, HC Silvaplauna-Segl ed il HC Alvra. Sche duas squadras mancassan en questa liga, stessan ils clubs restants acceptar viadis pli lungs per giugar ils gieus ordaifer chasa, tema Cla Duri Godly.
Pli lungs viadis, damain motivaziun
Fin uss eran ils clubs da hockey da la terza liga per gieus ordaifer chasa en viadi maximalmain in'ura, di Cla Duri Godly. Survesaivel per ils sportists. Ma sche quests temps da viadi avessan da s'augmentar, fiss tenor el da far quint che blers hockeyans smettessan a giugar.