L'EHC Lai Valbella – la meglra squadra grischuna da hockey en segunda liga – ha fatg sco emprima il pass en ils playoffs. L’equipa dal trenader Ivo Simeon ha segirà ina plazza tranter ils megliers otg da la liga gia il principi da schaner cun la victoria encunter il leader da la segunda liga, l'EHC Dürnten. Suenter l'EHC Lai Valbella è quai pass en ils playoff era reussì a l'EHC San Murezzan: trais partidas avant la fin da la qualificaziun ha San Murezzan pudì segirar ina plazza en la runda da k.o.
Sco davosa equipa grischuna è lura anc il CDH Engiadina vegnì latiers. Schegea ch'il CDH Engiadina ha pers la penultima partida dal campiunadi hai tanschì per la squadra dal trenader Benny Wunderer da far il pass en ils playoffs.
Il CDH Engiadina è levgià
La stagiun passada ha mancà al CDH Engiadina in sulet punct per esser da la partida en ils playoffs. L’equipa ha stuì far la via en la runda da promoziun che l’equipa engiadinaisa ha lura la finala gudagnà. Questa stagiun è quai auter: Ils playoffs èn gia ussa segirads, ed uschia resta l’equipa da l’Engiadina Bassa la proxima stagiun segir en segunda liga. Spezial è durant questa stagiun ch'il trenader ha stuì nominar divers fitg giuvens giugaders per l’emprima equipa. Pervia da las bleras feridas en il ravugl dal CDH Engiadina è l’equipa stada sfurzada da nominar ils giuvens. Quels giugaders giuvens han fatg fitg bain lur lavur e meritan tut il respect dal trenader Benny Wunderer.
