L'equipa da chasa da las Chicas dal HC Engiadina van sco perdidras dal glatsch, ellas han pers cun 1:2 cunter las adversarias da l'Engiadina'Ota. L'emprim gol han dentant las Chicas fatg, en il segund terz ha Célia Oberli tutgà l'emprima giada la noda. Anc en il medem terz ha però Silvana Steiner dal SC Schlarigna pudì egualisar la partida. Il terz terz è lura stà decisiv cun la megliera fin per Schlarigna, Arina Agrippi ha tutgà en la 50avla minuta il gol a Scuol.
Hockey da dunnas en Engiadina
En Engiadina dat quai duas equipas da hockey da dunnas: l’equipa da las Chicas dal CDH Engiadina e l’equipa da dunnas dal SC Schlarigna. L’equipa da l’Engiadin'Ota vala in zic sco equipa pioniera dal hockey da dunnas. Malgrà che l'EHC San Murezzan aveva l’emprima equipa da hockey da dunnas, ha la squadra dal SC Schlarigna survivì tut las crisas. Inqual dunna che ha cumenzà cun il hockey da dunnas a San Murezzan ha alura era dà cun il team da Schlarigna.
Chicas Engiadina datti dapi passa 10 onns
L’equipa da las Chicas dal CDH Engiadina datti passa 10 onns. L’equipa da las dunnas dal CDH Engiadina cumplettescha la sparta da hockey tar il CDH. Uschia dispona l’equipa da numerusas equipas da hockey dals pli pitschens fin tar l’emprima equipa ed uschia er dad ina equipa da dunnas che gioga dapi passa 10 onns il campiunadi en liga naziunala C.
Gist duas giugadras da renum naziunal èn vegnidas or da las partiziuns da junioras dal CDH Engiadina e da l’equipa da las Chicas. Sandra Schmidt da Sent è dapi divers onns giugadra da la liga naziunala A da tar las HCD Ladies e Talina Benderer è era schon vegnida nominada sco goli da l’equipa naziunala sut 18 onns.
