La giuvna golia Talina Benderer ha 17 onns. Ella fa il giarsunadi da commerzi ed è mintga minuta libra sin il glatsch. Surtut dat ella il campiunadi da juniors sut 20 onns cun l’equipa da juniors Grischun Hockey Sud. Quai è ina equipa nua che giuvens giugaders e giugadras da differentas equipas dal Grischun dal Sid han la pussaivladad da dar campiunadi. L’equipa U20 da Grischun Hockey Sud è il mument a la testa da la tabella.
Dal hockey cun giuvens umens en l’equipa naziunala
In emprim punct culminant ha Talina Benderer passentà durant il campiunadi mundial sut 18 onns a Zug. Per l’emprima giada ha la giuvna golia pudì dar uschia in turnier. Ella ha savì dar sco golia numer tut las partidas da l’equipa naziunala da giuvnas dunnas. Las partidas da gruppa aveva la Svizra anc pers. Il gieu decisiv per restar en l’emprima gruppa ha la squadra naziunala Svizra dentant gudagnà cun 2:1 cunter la Germania.
Al turnier da junioras ha Talina Benderer dà en egl
Suenter las partidas dal campiunadi mundial a Zug ha Talina Benderer fatg il proxim pass. Il trenader da la squadra naziunala da l’elita Colin Muller ha nominà la giuvna engiadinaisa per il turnier da tschintg naziuns a Liberec en Tschechia. Uschia po Talina Benderer far il proxim pass e star sin il glatsch cun las corifeas dal hockey da dunnas en Svizra – per exempel Lara Stalder (175 gieus), Stefanie Wetli (107 gieus) u Lara Christen (100 gieus).
A Liberec cumbatta la naziunala svizra a partir dals 5 da favrer cunter la Germania, la Svezia, la Finlanda e la Tschechia per il titel dal turnier da tschintg naziuns.
