Dapi che Sandra Schmidt da Sent è ina mattetta gioga ella hockey. Tar ella è la fascinaziun per quest sport vegnida messa en la tgina. Gia ses bab ed ils barbas han giugà a hockey, ed era ils frars da Sandra Schmidt han giugà quest sport. Ils emprims pass sin il glatsch ha Sandra Schmidt fatg tar il Club da hockey d’Engiadina. Pli tard ha ella giugà tar il EHC San Murezzan e dapi trais stagiuns en la pli auta liga da hockey da dunnas, tar il HC Thurgau. Da primavaira ha il HCD savì surprender la licenza da Thurgau per dar en la Women’s League. E cun la licenza ch’è vegnida tar il HCD ha era la giugadra Sandra Schmidt fatg midada.
Uss cun il num HCD realiseschan blers en tge liga ch'jau dun hockey. Blers savevan che jau giog hockey, dentant pir uss cun il num HCD realiseschan els sin tge livel ch'jau giog.
Da Thurgau tar il HCD è in grond pass
Davent da l’entschatta eri cler che Sandra Schmidt empruvass da vegnir a Tavau. La stad ha ella terminà l’emprendissadi sco educatura d'uffants pitschens. L’emprima plazza suenter l’emprendissadi ha ella uss chattà en ina canorta a Tavau. Sandra Schmidt lavura actualmain en in pensum da circa 90 pertschient.
Las sairas e las fins d’emna è ella engaschada cun il Club da hockey da Tavau. Per l’emprima giada en sia carriera sco sportista gudogna ella perfin in zichel raps cun dar a hockey. Quai grazia a la visiun dal HCD da metter en pe ina equipa professiunala e da vulair avair success cun quella.
Il pass a Tavau porta a la giuvna Engiadinaisa supplementarmain dapli confort. Ella n'ha betg pli da far ils lungs viadis davent da l’Engiadina a Kreuzlingen per ils trenaments cun las dunnas dal HC Thurgau. Uss è tut pli central ed uschia bler pli cumadaivel.
Metter ina chomma a las grondas squadras da la liga
Sch'il Club da hockey da Tavau va sin il glatsch, alura ha l’equipa l’ambiziun da gudagnar. Quai na vegn ad esser auter tar l’equipa da las dunnas, las HCD Ladies. L’organisaziun dal Club da hockey da Tavau ha sez enorm blera tradiziun e success en il sang. Uss cun la nova infrastructura vegn vitiers anc dapli professiunalitad, tut chaussas da qualas er las dunnas pon profitar. Pli baud mirava Sandra Schmidt ils stars dal HCD davent da la tribuna. Uss stat ella sez sin il medem glatsch sco quels e vul far il proxim pass. Il pli tard cura ch'il champiunadi cumenza ves’ins quant cumpetitiva che la nova squadra è e quant influenza ch'il num HCD cun tut ses success ha er sin l’equipa da las dunnas.
