Precis avant in onn ha il CDH Engiadina manchentà ils playoffs da la segunda liga per in solit punct. L’equipa da l’Engiadina Bassa ha stuì ir la via sur la runda da relegaziun. Be in onn pli tard ha la squadra pudì festivar il pli grond success da l’istorgia. Il CDH Engiadina è avanzà fin en il mezfinal. Sin la via en il mezfinal ha il CDH Engiadina bittà il grond favurit, il EHC Uzwil or da la decisiun.
Pli grond success da l’istorgia
Gia il fatg ch'il CDH Engiadina as aveva qualifitgà per la runda da k.o. en la segunda liga è atgnamain stà in success. E la participaziun als playoffs vairamain il dessert da la stagiun. Il pli tard cura ch'igl era cler ch'il CDH Engiadina po far part a la runda finala dal campiunadi ha l’equipa propi pudì giugar senza squitsch. E quai han ins sentì. En l’emprima runda dals playoffs ha il CDH Engiadina bittà il grond favurit, il EHC Uzwil or da la decisiun. En il mezfinal ha l’equipa dal trenader Benny Wunderer alura survegnì il victur da la qualificaziun, il EHC Dürnten sco adversari. Ed er en quella seria ha il CDH Engiadina mussà bunas partidas. Ils emprims duels tranter Engiadina e Dürnten èn vegnids decis a favur da l’equipa turitgaisa pir en la prolungaziun.
Experientschas nunpajablas
Cun ina fitg giuvna equipa è il CDH Engiadina avanzà fin en il mezfinal. Pervia da feridas han gist numerus giugaders da tschep betg pli pudì dar hockey. Uschia han ins stuì integrar giugaders per part fitg giuvens en l’emprima equipa. Tenor il trenader Benny Wunderer han quels fatg lur lavur stupent. En futur vegnan tuts a profitar da las experientschas ch'ins ha fatg durant ils playoffs da la segunda liga.