Per l’emprima giada en l’istorgia da l’equipa è il CDH Engiadina avanzà en ils mezfinals da la segunda liga. Il CDH Engiadina ha bittà l’equipa ch’era da favorisar, il EHC Uzwil or dals playoffs. Tut las trais partidas da la seria da quartfinal eran stretgas. L’emprim gieu ha il CDH Engiadina pers cun 0:1. Il segund gieu ha l’equipa da l’Engiadina Bassa gudagnà pir en la prolungaziun. Ed er durant il terz gieu era Engiadina l’emprim in retard. L’equipa ha dentant stort la partida e fat uschia il pass en il mezfinal. Per l’emprima giada insumma.
La via en il mezfinal era per il EHC Lai Valbella in zichel pli simpla. L’equipa dal Grischun Central mussa ina fitg buna stagiun. Lai Valbella ha terminà la qualificaziun sin plazza quatter da la tabella. Cunter Weinfelden en l’emprima runda dals playoffs ha il EHC Lai Valbella gudagnà cler. Gist en il segund gieu na ha l’equipa dal trenader Ivo Simeon laschà a Weinfelden nagina schanza e gudagnà cun 6:4.
Engiadina cunter Dürnten, Lai Valbella cunter Küsnacht
Per las equipas da hockey grischunas cumenzan las serias da mezfinal cun partidas ord chasa. Engiadina ha da far il viadi a Dürnten, che aveva gudagnà la qualificaziun en segunda liga. Lai Valbella va per l’emprima partida da la seria da mezfinal a Küsnacht.
Davent dad ussa mida il modus dals playoffs. Entant che l’emprima seria è vegnida decisa en il modus da «best of three», midi uss sin il modus da «best of five». Per vegnir en il final ston las equipas uss pia gudagnar trais gieus.
