L'Europa è en fevra da ballape. Amez ils gieus da gruppa dal campiunadi europeic. Sin ils pastgets dal ballape regiunal èsi vegnì quiet. L'adrenalin, las emoziuns ed ils cumbats per puncts e gols pon far pausa da stad. En las ligas regiunalas è il campiunadi a fin. Equipas ch'han cuntanschì u perfin surpassà las spetgas e finamiras. Auters han be parzial cuntanschì quai ch'ins vuleva u insumma betg. Ed anc pli amar, equipas che ston ceder, ch'han dà lur ultim campiunadi e vegnan schliadas per mancanza da giugaders.
En terza liga resta quasi tut tuttina
En terza liga vegni era la proxima stagiun a dar il derbi sursilvan e rumantsch tranter l'US Schluein Glion ed il CB Trun/Rabius. Il club da la Cadi ha terminà la stagiun cun 25 puncts gist sur il stritg. Dentant cun in avantatg da 13 puncts sin il segund davos, il club da Domat. Il club da la Foppa ha fatg 46 puncts e terminescha la stagiun sin il segund plaz. Il retard sin ils campiuns dal FC Schaan e sin la promoziun en segunda liga munta a 12 puncts. Omadus clubs avevan atgnamain avisà dapli. L'US Schluein Glion avess gugent cumbattì per la promoziun. Ha dentant gia en la runda d'atun stuì acceptar la dominanza dal club dal Principadi da Liechtenstein. Il CB Trun/Rabius aveva avisà in plaz amez la tabella en terza liga. La finala è l'entir campiunadi stà in cumbat enturn il stritg ed encunter la relegaziun. En discurs cun RTR guardan ils trenaders Patric Casutt (US Schluein Glion) e Claudio Bundi (CB Trun/Rabius) enavos sin inqual mument da frust ma era da plaschair. Per omadus èsi stà lur emprima stagiun sco scheftrenaders. Entant che Claudio Bundi stat è proxima stagiun a la lingia chala Patric Casutt e turna sin agen giavisch enavos en la posiziun dal trenader assistent da l'emprima equipa da l'USSI. Da nov surpiglia Mirco Zala la pli ferma equipa da ballape da la Surselva. El ha fin uss trenà e lavurà cun juniors. Schluein Glion daventa sia emprima staziun sco trenader d'ina equipa activa. Tar l'USSI giogan era ils figls dal nov trenader, Lars e Laurin Zala.
