L’entschatta ha fatg il CB Schlarigna en il duel cunter il FC Wängi. L’equipa da l’Engiadin'Ota ha battì la squadra dal chantun Turgovia en la lutga da penaltis cun 5:4. Da las equipas grischunas ha il CB Schlarigna fatg sco emprima il pass en il otgavelfinal da la prerunda da la Cuppa svizra. Be in di suenter il CB Schlarigna ha er il CB Surses fatg il medem. La squadra dal Grischun Central ha battì il FC Müsterlingen cun 6:5. La partida era in festival da gols, a la fin cun la meglra fin per l’equipa grischuna. Sche las equipas grischunas gudognan er las partidas dad otgavelfinal san ellas siemiar vinavant dad ina participaziun a la Cuppa svizra da ballape.
Las cundiziuns a Schlarigna la mesadad da settember eran difficilas. Il cunfin da la naiv era be paucs meters sur la vischnanca ed in vent fraid suflava sur la plazza da ballape San Gian sin 1’700 meters sur mar. Tuttina era l’equipa indigena engaschada ed ha suenter in retard anc egualisà il gieu cunter Wängi. Quels eran suenter in lung viadi dal chantun Turgovia sur il Pass dal Gelgia gia stanchels tar l’arrivada en Engiadina Auta. Il CB Schlarigna as ha salvà sur il temp e la fin finala gudagnà la lutga da penaltis cun 5:4. Um da la partida era senza dubi il goli dal CB Schlarigna Diego Carrajo Santos che ha tegni l’emprim penalti.
La Cuppa svizra da ballape e l’unica concurrenza nua che ballapedists da hobi san forza dar ina giada encunter ina equipa professiunala. La cuppa è perquai adina ina aventura tut speziala. Betg da rar vegn quai a l’inscunter tranter «David e Goliat». Per las equipas che dattan il campiunadi en las ligas pli bassas vul quai dentant dir ch’ellas ston sa qualifitgar per quest turnier.
Il CB Schlarigna, la meglra equipa da ballape engiadinaisa che participescha al campiunadi en quarta liga, è durant ils davos duos onns adina vegni sur la prerunda ed è lura crudà or da la qualificaziun en il 1/32avel final, respectiv en il sedeschavelfinal. Er questa stagiun è l’equipa dal trenader Emmanuel Agbike puspè sa qualifitgada per il gieu da sedeschavelfinal. Qua spetga uss l’equipa dal chantun Turgovia, il FC Wängi che dat il campiunadi en la terza liga.
Tranter campiunadi e Cuppa svizra
Il campiunadi da la quarta liga è pir quatter partidas veglia. En questas quatter partidas ha il CB Schlarigna gudagnà be ina giada. Ina victoria ha il CB Schlarigna er sin il conto da la cuppa Svizra. Cunter il FC Wängi vul il CB Schlarigna far il proxim pass ed uschia sa qualifitgar per ils otgavelfinals. Quai che fiss per l’equipa da l’Engiadin'Ota in grond success.
