Pervia dal lung enviern en Engiadina'Ota gioga il CB Schlarigna sias emprimas partidas da la runda da primavaira en quarta liga adina ord chasa. A Schlarigna spetg’ins ditg che la naiv sin la plazza da ballape da San Gian lieua e che las temperaturas creschan. La primavaira dovra quai pazienza. Il sulegl duai stgaudar il tschispet, per dar alura cura che tut è pront las emprimas partidas da chasa.
La naiv è luada, il tschispet dentant anc adina bletsch
Er sche la naiv e luada sin la plazza da ballape da San Gian, na astg’ins betg ir memia baud sin la plazza. Il tschispet sto propi esser sitg, pir lura pon ins dar ballape sin la plazza. Era sche la federaziun da ballape ha prevesì l’emprima partida da chasa dal CB Schlarigna per la dumengia ils 5 da matg, ston ins mirar tge che l’aura fa. Sch'il sulegl na dumogna betg da sientar il tschispet, alura sto ins sviar sin la plazza artifiziala da Promulins a Samedan.
Trenament durant ils mais d’enviern en halla e sin tschispet artifizial
Bleras onns s'ha il CB Schlarigna preparà sin la runda da primavaira en halla da gimnastica e lura a partir dal mars er sin il tschispet artifizial da Samedan. Cun quai che Poschiavo ha dapi curt era ina plazza da ballape cun tschispet artifizial po er il CB Schlarigna profitar da quella sparta. Dapi emnas fa l’equipa perquai il viadi sur il Pass dal Bernina per trenar a Poschiavo sin la runda da primavaira. Il pli gugent dat il CB Schlarigna dentant tuttina a chasa sin il agen tschispet a San Gian. Sche l’aura permetta duess quai capitar la proxima fin d’emna cun il gieu encunter la terza equipa da Domat.
