En quarta liga da ballape è il CB Schlarigna sa chattà en ina nova situaziun. Perquai che l’equipa ha gudagnà durant la runda d’atun be ina solita partida è ella crudada a la cua da la tabella. Suenter l’emprima mesadad dal campiunadi en quarta liga ha il CB Schlarigna stuì passentar l’enviern sin la davosa plazza. Davent da l’entschatta na armonisava l’equipa betg cun il trenader. Uschia che ins s’ha separà da quel.
Nov schlantsch cun nov trenader
Igl è in cas da fortuna che il CB Schlarigna ha pudì chattar in nov trenader. Emmanuel Oluij Agbike lavura tar il Lyceum Alpinum a Zuoz e s’ha mess a disposiziun. Sut la batgetta dal nov trenader è puspè turnà il success tar Schlarigna. L’equipa ha gudagnà duas da las emprimas trais partidas da la runda da primavaira. Impurtant è segir stà, ch'il CB Schlarigna ha gudagnà encunter la segunda equipa da Valposchiavo Calcio. Uschia ha ella pudì dar giu la laterna cotschna a l’equipa da la Val Poschiavo. Cun nov schlantsch piglia la meglra equipa da ballape engiadinaisa ussa per mauns la runda da primavaira.
Quai che na funcziunava betg era che il trenader na armonisava betg cun l’equipa
