Anc avant paucs onns era il CB Schlarigna ina squadra che cumbatteva per la promoziun en terza liga. Duas giadas ha la squadra da l’Engiadin'Ota manchentà questa finamira mo per in solit punct. La pandemia da corona ha dentant franà la meglra equipa da ballape engiadinaisa. Il CB Schlarigna n'ha betg pli la qualitad che l’equipa aveva anc avant quatter u tschintg onns. Gia la stagiun passada ha la squadra stuì sbatter cun difficultads. La runda da primavaira per exempel era ina per emblidar, nua ch'il CB Schlarigna perdeva ad in perder.
Difficultads da vegnir en il champiunadi
Uschia sco che la veglia stagiun è ida a fin cuntinuescha il nov champiunadi. Las emprimas duas partidas da quest nov champiunadi ha la squadra pers. Il CB Schlarigna è en quarta liga a la cua da la tabella. Per part n'ha la squadra gnanc giugà pli nausch che l’adversari, tuttina n'èsi ni gartegià al CB Schlarigna da volver, ni perfin da gudagnar in gieu. Pervia dal nausch cumenzament da la nova stagiun cuntinuescha la squadra tuttina da lavurar sco fin da qua. La finamira dal CB Schlarigna è da furmar cun ils giuvens giugaders ina equipa per il futur.