Il Big Air a Cuira n'ha betg lieu l'auter onn. Ils organisaturs èn sa decis cunter l'eveniment da freestyle, pervi da las lavurs per la nova halla d'events e da messa sin la Obere Au . Malgrà ch'els hajan empruvà da chattar in auter termin per l'eveniment, na vegnia betg ad esser pussaivel da manar tras el, scrivan ils organisaturs dal festival. Quai sincerescha era Urs Marti, il president da la citad da Cuira areguard l'eveniment:
Nus avain examinà differents lieus per la schanza, ma ins sto adina ponderar il vent sco era la exposiziun da la schanza, che munta ina part substanziala areguard la segirezza dals atlets e las atletas.
Vinavant precisescha il president da la citad, che era la FIS n'avessia betg giavischà in'autra data. Sche, lura duess quai dar il Big Air al cumenzament da la stagiun da freestyle a Cuira e betg pir da primavaira. Auters lieus, sco. p. ex. Domat n'èn betg vegnids en dumonda pervi che la citad da Cuira vul, che l'event haja lieu a Cuira sez, uschia Urs Marti vinavant.
Finanziaziun spustada
La citad da Cuira ha garantì ina cunfinanziaziun da l'eveniment per ils onns 2022 fin e cun il 2026. Tras quai che l'eveniment na vegn betg manà atras l'onn che vegn, vegn questa prestaziun spustada dals onns 2025 / 2026 sin ils onns 2026 e 2027. La finanziaziun da la citad da Cuira munta per tschintg onns a total 2,38 milliuns francs, mintg'onn cun ina summa pli e pli pitschna. Quai ord il motiv ch'els ageschian sco ina sort sponsur che gidia a l'eveniment a l'entschatta sur las rundas, ma betg a lunga vista. L'eveniment custa per ediziun enturn 4,5 milliuns francs.
2026 cun nova halla
La nova halla da la citad sto esser pronta sin il 2026 per la festa naziunala da tir. Sin lura speran era ils organisaturs da pudair execuir l'eveniment da sport e musica sin l'areal da l'Obere Au ensemen cun la nova halla. Las datas concretas per il Big Air 2026 duajan anc vegnir publitgadas. Il 2021 ha il Big Air gì lieu l'emprima giada a Cuira.
Or da l'archiv