Gia dapi in mez tschientaner datti en Engiadina Bassa la cursa «Passlung» da Martina fin a Scuol. Per l’ediziun da giubileum èn uschè bleras curridras e curriders annunziads sco dapi 20 onns betg pli. Passa 180 sportistas e sportists èn stads a la partenza da la cursa da tradiziun.
Plazzas da podest indigenas
La cursa è sa chapescha la cursa da chasa per passlunghistas e passlunghists engiadinais. E quels han persvadì gist en omaduas cursas. Tar ils umens è il giuven Marchet Nesa da Scuol vegnì segund. Be Max Olec da la Germania è stà in zic pli spert ch'il giuven passlunghist da Scuol. Ed er tar las dunnas ha quai dà ina plazza da podest indigena. Helena Guntern da Ftan è vegnida segunda. La cursa da las dunnas ha gudagnà Ylvie Folie dal Tirol dal Sid.
«Hill to hell» senza accident
Pervia da l’aua gronda da la stad passada han ils organisaturs da la cursa da giubileum stuì spustar la loipa. Suenter circa 10 kilometers a Pana-sch sut Ramosch han els stuì ir auter suenter il Plan da Muglin, l’emprim da la costa si e lura puspè engiu. La cursa aval da questa costa han els battegià «Hill to hell», pervia che quest toc è fitg stip. Circa 250 meters han tut las curridras ed ils curriders stuì vegnir da la costa giu. Per fortuna n'ha quai betg dà accidents ed il president dal comite d’organisaziun Xaver Frieser ha pudì far ina bilantscha positiva suenter la cursa.
