Cursa da passlung La Diagonela - Festa norvegiaisa en Engiadin'Ota

Gia per la 12avla giada èn vegnidas organisadas en Engiadin’Ota cursas da passlung en il stil classic a La Diagonela. Pervia da la pauca naiv han ils organisaturs stuì scursanir la cursa roiala dals usitads 55 kilometers sin 43 kilometers. Tuttina ha quai dà ina cursa fitg cumpetitiva, nua che danovamain ils curridurs e las curriduras norvegiaisas han occupà tut las plazzas da podest. Tar ils umens era Amud Riege il pli spert, tar las dunnas Silje Oyre Slind.

Il pli spert indigen è stà sco gia tar l’emprima cursa en il rom da La Diagonela, la sairada Roseg, Curdin Räz da Segl. El ha terminà la cursa sin plaz 73.

Bilantscha ordvart positiva e nov record da participantas e participants

A la 12avla ediziun da La Diagonela hai anc ina giada dà in augment dal dumber da participantas e participants. A l’ediziun 2025 han passa 1700 curriduras e curridurs fatg part. La bella aura e las temperaturas agreablas en Engiadin’Ota han sa chapescha gidà che la bilantscha è positiva. Las cursas han pudì vegnir realisadas senza gronds incaps. E malgrà la stentas avant las cursas cun ils midaments da singuls trajects è la bilantscha positiva suenter la cursa a Zuoz.