Il Maraton da skis engiadinais ha fatg l’entschatta. Dapi 55 onns datti la cursa da passlung tranter Malögia e S-chanf. L’emprima ediziun è stada l’onn 1969. Be intgins onns pli tard han entusiasts dal sport da passlung creà en Engiadina Bassa ina cursa sumeglianta. Il Passlung è bain be la mesadad uschè lung sco il frar grond, il Maraton da skis engiadinais, il Passlung è dentant er ina cursa cun fitg gronda tradiziun. L'occurenza festivescha quest enviern ses giubileum da 50 onns.
Armon Nuotclà dapi l’entschatta a la partenza
Cun il passlung ha Armon Nuotclà cumenzà gist cura ch’el è vegnì ord scola. L’emprim gieva el cun skis. Suenter ha el empruvà da far passlung. Quai era pervia ch'il club da skis organisava cursas cumbinadas, alpin e nordic. Ils emprims pass sin las lattas stretgas ha el fatg cun skis da passlung ch’el aveva d'emprest. El curriva suenter ad insatgi che fascheva gia passlung per emprender da quel. Uschia è creschida pass per pass la fascinaziun per quest sport.
Organisar ina cursa da passlung en Engiadina Bassa
Suenter ch'ins ha organisà las emprimas giadas il Maraton da skis engiadinais è er creschi en Engiadina Bassa il giavisch d'organisar ina cursa da passlung. L’entschatta era tut nov ed intgins entusiasts han prendì la chaussa enta maun. Uschia han ins fatg ina loipa da Scuol a Martina. 22 kilometers sin pastgs, atras il guaud e per lung da la riva da l’En fin a Martina. La cursa è sa sviluppada d’in cuntin ed Armon Nuotclà è adina stà da la partida. Quest enviern gia per la tschuncantavla giada.
Cun il giubileum da la cursa en Engiadina Bassa festivescha er Armon Nuotclà il giubileum dad in mez tschientaner da la concurrenza Passlung.