En la tschintgavla partida da mezfinal en la seria da «best of five» hai dà ina terrada per il club da Lai-Valbella, quai cun 1:4 cunter Küsnacht. En ils emprims dus terzs ha il club da Lai-Valbella anc pudì tegnair pitg, en l'ultim dentant ha Küsnacht sajettà trais gols. Uschia cuntanscha il SC Küsnacht il final en la segunda liga regiunala da hockey.
Optimissem avant partida decisiva
Avant che giugar l'ultima partida era l'equipa optimistica da pudair prender cun ella il schlantsch or dals ultims gieus. Lai-Valbella aveva numnadamain egualisà la seria sin 2:2 – suenter esser stà enavos 0:2.
Per sia equipa saja ussa il final la clera finamira, ha il trenader Ivo Simeon ditg envers RTR curt avant che giugar il tschintgavel gieu da mezfinal. L'equipa saja creschida e sa preschentia sco equipa cun in ferm caracter – las ultimas duas victorias cunter Küsnacht hajan mussà ch'els sajan pronts per la gronda finamira da la stagiun.
