Derbis èn adina insatge spezial. Il derbi cunter San Murezzan è questa giada stà decidì gia baud. Cun trais gols or da mintgamai ina fasa da powerplay manava Lai Valbella suenter l'emprim terz cun 3:0. Il segund terz ha il club da chasa gudagnà cun 3:1. Be l'ultim terz han ils Engiadinais decidì cun 2:1 a lur favur.
Pront per ils playoffs
Flavio Cola, il co-schef da sport dal club da hockey Lai Valbella è sa mussà fitg cuntent da la prestaziun da sia squadra. Quai saja stada ina victoria impurtanta per sa segirar l'avantatg da chasa en vista a la runda da playoffs.
Clubs engiadinais en fasa da cumbat
Tant il club da hockey da San Murezzan sco er il club da hockey Engiadina han pers en la runda actuala, la quartultima da la stagiun regulara. Dentant che San Murezzan ha tschintg puncts dapli sin il conto ch'il concurrent da la val, ha il club da hockey Engiadina be dus puncts avantatg sin il stritg ed il club da Glarus. Las ultimas trais partidas da la runda da qualificaziun èn uschia per Engiadina partidas da grond'impurtanza.