Cun consultar statisticas ed il cader dal EHC Lai Valbella è bainspert cler: il club dal Grischun Central è in ferm club – sin il palpiri probablamain il pli ferm da la segunda liga. Quai sa er il trenader Ivo Simeon ch'è la segunda stagiun a la banda. La liga saja dentant er ina fitg equilibrada, uschia che mintgin possia gudagnar. Cun guardar sin ses cader e la stagiun enfin ussa vegn Simeon er a la conclusiun ch'il mix da giuvens e rutinads funcziunia fitg bain. Avant dus onns saja la truppa anc stada ina maschadada – ussa sa mussa che la cumbinaziun da giuvens selvadis e giugaders cun rutina en autas ligas funcziuna fitg bain.
Derby grischun
La sonda è il club da Lai Valbella scuntrà sin il club da hockey da San Murezzan en il derby grischun. Partidas cunter ils Engiadinas sajan adina interessantas ed intensivas. Cun savair d'avair gudagnà l'ultim inscunter en Engiadina dettia quai segir confidenza. Il sbagl da sutvalitar l'adversari na fetschia l'equipa dentant segiramain betg, perquai saja la segunda liga memia equilibrada. Gudagnà il gieu a chasa han ils da Lai cun 7:3.
