Gist trais equipas grischunas dattan il campiunadi da hockey en la gruppa in da la segunda liga. Il EHC Lai Valbella e las duas equipas engiadinaisas CDH Engiadina ed il EHC San Murezzan. Entant che San Murezzan emprova da far puspè il pass en ils quartfinals dals playoffs, èn las ambiziuns tar il CDH Engiadina pli modestas. Durant ils ultims onns eri adina la finamira principala da restar en la segunda liga. Cun la qualificaziun per ils playoffs, quai vul dir, cun esser classà tranter las meglras otg equipas da la liga, fiss quella finamira cuntanschida.
Quasi cun la medema equipa en la nova stagiun
En l’equipa dal CDH Engiadina n'ha quai betg dà grondas midadas. L'in u l’auter giugader n’è betg pli da la partida, perquai èn auters puspè enavos, suenter ch’els eran sa fatg mal durant la stagiun passada. Il credo dal CDH Engiadina è insumma da dar hockey cun ils agens giugaders, cun giugaders da la regiun. Il batschigl da giugaders indigens è gea pitschen. Tuttina ha il schef da sport Domenic Bott pudì metter ensemen ina flotta equipa. El è er persvadì ch'ins sa dar in bun campiunadi cun questa equipa.
Il grond midament en sasez sper il glatsch
Per sustegnair il trenader Benny Wunderer ha il CDH Engiadina engaschà la primavaira passada Evelyn Maderegger sco nova trenadra. Ella vegn a sustegnair Benny Wunderer tar las equipas da juniors, dentant e surtut er tar l’emprima equipa dal CDH Engiadina. Evelyn Maderegger ha sez er dà hockey. Ils davos onns era ella engaschada en la partiziun da juniors da Red Bull Salzburg. A Scuol en l'Engiadina Bassa vul la trenadra uss far cun il CDH Engiadina il proxim pass.