resultat final 3:4 - EHC San Murezzan gudogna er il segund derby da la stagiun

Gia per la segunda giada questa stagiun va San Murezzan sco victur giu dal glatsch en il derby engiadinais. Cun 3:4 è ida a fin ina partida fitg equilibrada a favur da l'equipa da l'Engiadin'Ota. Il gol decisiv per San Murezzan ha sajettà l'attatgader Marc Camichel suenter ina bella acziun individuala. El ha discurrì suenter la partida d'in dals bels derbys ch'el haja giugà, cunquai che las duas equipas sajan sa duelladas da moda fitg eguala.

Fertant ch'il giugader da San Murezzan è cuntent che sia squadra ha pudì segirar ils trais puncts, è Livio Noggler dal CDH Engiadina trumpà che sia equipa n'ha betg nizzegià las schanzas e fatg memia pauc ord lur bunas fasas durant la partida.

Classicher dapi blers onns

Il duel CDH Engiadina cunter EHC San Murezzan datti gia dapi lung temp. Per ils giugaders da las duas equipas èsi in gieu spezial, cura ch'els pon sa mesirar cun la squadra vischina en la vallada. Ils ultims onns è il derby magari stà egualisà, forsa cun pitschens avantatgs per l’equipa pli veglia, quella cun la pli lunga tradiziun, numnadamain l'EHC San Murezzan.

CDH vs. EHC – l’Engiadina Bassa cunter l’Engiadin'Ota

La tradiziun da l'EHC San Murezzan è immensa. L’equipa, ch'exista dapi passa in tschientaner, stat per ils cumenzaments dal sport da hockey en il Grischun. Anc avant ils gronds success dal Club da hockey da Tavau u da l'EHC Arosa, aveva l'EHC San Murezzan gia scrit istorgia da hockey en Svizra. Ils onns 20 dal davos tschientaner aveva l'equipa gudagnà trais giadas il titel dal campiunadi svizzer. Ed or da quell'organisaziun, derivan er uschia dotads giugaders sco per exempel Bibi Torriani, Roberto Triulzi, Marc Gianola, Gian-Marco Crameri, Raeto Raffainer u era per il mument activs sco Nico Gross e Davyd Barandun .  

Engiadina ed il trenader

A la fin da la stagiun passada aveva il CDH Engiadina decis e communitgà, d'as vulair meglierar e puspè s'etablir pli fitg en la liga. En sasez era sin basa d'in midament tar la posiziun dal trenader, uschia ch'il club aveva engaschà in nov trenader. Suenter be in pèr gieus è quel dentant vegnì relaschà ed il trenader da juniors, Benny Wunderer, ha puspè surpiglià l’emprima squadra. Dapi lura è Wunderer enavos sco coach principal dal CDH Engiadina. Ed el ha success cun ses sistem: Il CDH Engiadina gioga dapi l’entschatta dal campiunadi a moda solida.

Ils giuvens èn s'integrads stupent

Il CDH Engiadina ha stuì far or d’ina necessitad ina virtid: L’equipa da l’Engiadina Bassa ha in cader stretg, e perquai ha il trenader Benny Wunderer integrà da l’entschatta e consequent ils giugaders giuvens en l’emprima equipa. E quels giuvens èn s'integrads gia fitg bain. Els na giogan be cun, surpiglian dentant gia ina tscherta responsabladad e survegnan temp sin il glatsch, era en ils uschè numnads special teams, powerplay e boxplay. Quai funcziunescha fitg bain. Els han fatg frunt e surpiglià lur novas rollas e pon uschia gidar al CDH Engiadina. E cun mintga partida dapli ch’els dattan en segunda liga, crescha l’experientscha ed uschia era la confidenza en las atgnas abilitads. Suenter las emprimas 10 partidas dal campiunadi è il CDH Engiadina – pia era grazia ils giuvens – rangà sin plazza sis da la tabella.

San Murezzan ed il start miserabel

Gist in pèr giugaders da tschep da l'EHC San Murezzan han terminà a la fin da la davosa stagiun lur carriera, u ch’els han bandunà l’equipa pervia da motivs professiunals. Al cumenzament da la nova stagiun ha l'EHC San Murezzan perquai stuì pajar char quellas perditas da persunal ed è partì fitg mal. La nova squadra, cun fitg blers giugaders giuvens, è vegnida malsegira ed ha stuì magunar inquala sconfitta. Suenter set partidas eran perquai mo dus puncts sin il conto. Puncts, che l’equipa aveva gudagnà en l'emprim derby engiadinais cunter il CDH Engiadina.

Nova situaziun per l'EHC San Murezzan

Uschia ina seria da sconfittas na hai ditg betg pli dà tar l'EHC San Murezzan. Ils giugaders, dentant era il team da trenaders, eran confruntads cun ina situaziun nova. La malsegirezza era gronda ed in recept per vegnir or da questa situaziun n'era betg gist immediat avant maun. L’equipa ha dentant lavurà vinavant, nagin n'ha pers la pazienza ed uschia èsi gartegià al club da gronda tradiziun da vegnir or da la crisa.

Il gieu dals 20 da november cunter Glaruna è stà decisiv: Malgrà che San Murezzan è stà cun 1:3 en retard, ha l’equipa anc vieut la partida e la finala gudagnà cun 8:4. Quai è stà il punct da partenza per vegnir or da la miseria. Dapi lura ha San Murezzan gudagnà dus ulteriurs gieus. Totalmain cun far 20 gols ed uschia s'han ils giugaders bunamain savì «sajettar or da la crisa». La squadra da l’Engiadin'Ota ha dà giu la laterna cotschna ed è rangada actualmain sin plazza set da la tabella, cun 4 puncts retard sin il CDH Engiadina.