Il chalender da la cuppa mundiala da quest enviern cuntegn sper Sölden bleras staziuns enconuschentas. Auter ch'ils dus onns passads n'è dentant Zermatt betg pli lieu ospitant per la cuppa mundiala, quai suenter ch'ins aveva stuì annullar ils ultims dus onns las cursas rapidas al Matterhorn pervia da l'aura.
Quatter staziuns en Svizra
Malgrà che Zermatt manca en il chalender fa il circus alpin tuttina visita en quatter destinaziuns en Svizra. Uschia datti sco mintg'onn per ils umens ils classichers ad Adelboden (11 e 12 da schaner) e Wengen (17 enfin 19 schaner) e las dunnas cumbattan per tschientavels a San Murezzan (21 e 22 da december). En il chalender dals umens datti quest enviern er ina cursa rapida ed in super-g a Crans Montana (22 e 23 da favrer). L'ultima giada hai dà cursas dals umens il 2012 a Crans Montana. Persuenter n'han las dunnas questa stagiun naginas concurrenzas en il Vallais.
Campiunadis mundials en l'Austria
Mintga dus onns vai en il ski alpin per ils titels da campiunessas e campiuns mundials. Dals 4 enfin ils 16 da favrer cumbattan las atletas ed ils atlets per las medaglias a Saalbach-Hinterglemm en l'Austria, il punct culminant da la stagiun da skis. A fin va la stagiun questa giada en ils Stadis Unids. A Sun Valley en il stadi d'Idaho ha lil final da la cuppa mundiala lieu. L'ultima giada ch'igl ha dà là cursas da la cuppa mundiala è stà l'onn 1975. Il pli tard lura vegn decis tgi da las skiunzas e dals skiunzs ch'han dominà las disciplinas ed er tgi che gudogna la gronda culla da cristal.
Dovras ina challenge betg mo digitala?
Alura è la nova «game-show» da RTR l'endretg. Ina equipa da duas persunas ha la schanza da gudagnar fin a 400 francs en cash. Il sulet ch'i dovra è da dumagnar l'equipa da RTR, Elias Tsoutsaios e Marcus Petendi.
