Pli datiers che la fin da questa stagiun da la cuppa mundiala da skis vegn e pli fitg han ins puspè discutà sur da las cursas rapidas al Matterhorn. Il davos e quest enviern eran planisadas mintgamai duas cursas rapidas per ils umens e las dunnas al cumenzament da la stagiun – omaduas giadas han ellas stuì vegnir annulladas. L'aura da l'entschatta november ha fatg in stritg tras il quint.
Spustar las cursas na saja nagina opziun
Ils responsabels da la FIS avevan proponì als organisaturs al lieu da spustar quests termins perquai che da quest temp saja l'aura savens betg adattada per in'occurenza da skis. Dentant senza success, ils organisaturs al lieu han argumentà ch'i hajan en la stagiun auta memia paucas chombras a disposiziun. Uschia han las partidas involvidas stritgà questas cursas per entant. En il chalender vegnan quellas cursas rapidas a mancar la stagiun proxima.
«Er sche tut fiss organisatoricamain pussaivel, èn avertas actualmain tantas dumondas da princip en connex cun il chalender futur da la cuppa mundiala che nus essan vegnids en dialog cun tut ils acturs suenter avair ponderà minuziusamain da sistir il Matterhorn Speed Opening», sa lascha citar Diego Züger, ensemen cun Walter Reusser manader tar Swiss-Ski.
Detagls ston anc vegnir sclerids
Questa decisiun avev'ins atgnamain planisà da publitgar pir ils proxims dis. En il rom dal final a Saalbach ha tranter auter il president da la FIS, John Eliasch, ditg che las cursas a Zermatt/Cervinia n'avessan nagin plaz l'enviern proxim, uschia che ils organisaturs han stuì prender posiziun.
«Cunquai che tut ils detagls n’èn anc betg sclerids, era la communicaziun da vart da la FIS planisada pir sin l’emna che vegn. A la fin dals quints sto il FIS-Council prender la decisiun definitiva sch'ins prenda las cursas or dal chalender 2024/25 u betg», ha Züger ditg vinavant.
