La delegaziun grischuna è la pli gronda tar las emprimas cursas da la cuppa mundiala da skis a Sölden. Gist quatter skiunzs èn Grischuns: Gino Caviezel, Thomas Tumler, Livio Simonet e Fadri Janutin. Tar las dunnas n'è nagina Grischuna selecziunada. Lara Gut-Behrami vegn ad esser l’atleta svizra che vegn a star en il focus. La skiunza tessinaisa aveva gudagnà la davosa ediziun da la cursa sin il glatscher da Rettenbach sur Sölden.
Dapi l’onn 2000 dat Sölden l’entschatta
Igl è gia ina lunga tradiziun che las emprimas cursas da l’enviern han lieu a Sölden. Il glatscher da Rettenbach è la culissa perfetga per far questas cursas gia uschè baud en la stagiun. La partenza è sin passa 3’000 meters sur mar. Gia quai pretenda bler da las skiunzas ed ils skiunzs. Sölden è dentant er in bun lieu per l’equipa svizra per cumenzar cun la nova stagiun da skis. Tar las dunnas è Lara Gut-Behrami cun trais victorias ed ina segunda plazza la victura da record. Ed er tar ils umens tutgan ils skiunzs svizzers tar ils megliers. Actualmain è Marco Odermatt cun duas victorias ed ina segunda plazza tranter ils top quatter da Sölden.
Gino Caviezel cun nov material
Suenter divers onns tar ina marca da skis franzosa è Gino Caviezel turnà tar quella marca da skis, cun la quala el aveva cumenzà sia carriera. Caviezel è enavos sin ils skis dad Atomic. Da questa midada s'empermetta il skiunz da 32 onns bler. Uschia vul el metter anc ina giada in accent che duai purtar ad el anc pli enavant. Ina terza ed ina quarta plazza ha Gino Caviezel sin il conto da Sölden. Cun il nov material vi dals pes vul el far il proxim pass.
Livio Simonet vul far il proxim pass
Per Livio Simonet da Casti è la stagiun passada stada l’emprima ch’el ha pudì ir gist in pèr giadas a la partenza d'ina cursa da la cuppa mundiala. Ina 14avla plazza al slalom gigant da Palisades Tahoe en ils Stadis Unids è stada la meglra plazza. Uss vul il spezialist da las disciplinas tecnicas far il proxim pass. E Livio Simonet è pront per far quest pass.
Lara Gut-Behrami ha puspè gust vi dal skis
La stagiun passada è puspè stada ina fitg buna per Lara Gut-Behrami. La skiunza tessinaisa ha gudagnà per la segunda giada il classament general da skis. Er sch’ella ha stuì far ina pausa suenter la stagiun, la preparaziun en vista a la nova stagiun è reussida, ed uss s’allegra l’atleta sin il nov enviern cun il punct culminant vers la fin da la stagiun: ils campiunadis mundials da skis a Saalbach-Hinterglemm en Austria.
