En la qualificaziun han las duas squadras già dà quatter gieus ina cunter l'autra. Trais giadas han las dunnas da Zug gì la meglra fin – en tut ils gieus è la decisiun dentant crudada mo cun in gol differenza. Quest fatg mussa che piculezzas fan la differenza, sche questas duas equipas sa mesiran sin il glatsch.
Er l'attatgadra Renée Lendi spetga ina seria fitg guliva. Bler vegnia a sa decider en il chau. Plinavant possia la gnervusitad giugar ina rolla en gieus da playoffs, manegia la giugadra da 20 onns. I saja dentant er impurtant da giudair quests gieus. «Igl è il pli bel temp da l'onn, sco il punct sin l'i. E quai motivescha da metter si anc ina crena».
Tgi che vul pli fitg la victoria vegn a gudagnar la seria.
La qualificaziun ha Zug terminà sin plazza 2, ed il HCD sin plazza 3. Cunquai che mo las duas fermas equipas da la qualificaziun èn sa qualifitgadas direct per ils playoffs, han las HCD Ladies anc stuì dar ils play-ins. Cun victorias da 8:1 e 5:2 n'han ellas dentant laschà nagina schanza a las dunnas da Fribourg-Gottéron. Uschia èsi er cler che las Grischunas van plain fidanza en la seria da best-of-5 encunter Zug. En il segund mezfinal frunta il victur da la qualificaziun Berna sin Ambri-Piotta.