Il settember ha lieu tradiziunalmain la chatscha grischuna. La chatscha da puncts cumenza il settember dentant era per las equipas da hockey grischunas. Sco emprima liga cumenza il campiunadi da hockey en la Women’s League cun l’equipa da dunnas dal HCD. Per las HCD Ladies è quai la segunda stagiun en la meglra liga da hockey svizra. Cun bleras novas giugadras e cun ina nova trenadra.
Johanna Ikonen – nova trenadra HCD Ladies
La pli gronda midada hai quai dà sper il glatsch da las HCD Ladies. Andrea Kröni ha bandunà l’equipa la primavaira ed il HCD ha engaschà Johanna Ikonen. La trenadra finlandaisa ha gudagnà tar ils gieus olimpics a Nagano la medaglia da bronz cun l’equipa naziunala. Sco trenadra è ella surtut stada activa en la Germania ed en l'Austria. Uss vul Jojo, co Johanna Ikonen vegn era numnada far il proxim pass cun las HCD Ladies.
Sandra Schmidt
Per la defensura engiadinaisa Sandra Schmidt è quest gia la tschintgavla stagiun sin il pli aut livel da hockey da las dunnas en Svizra. La defensura è vegnida dal HC Thurgau Ladies a Tavau e vul suenter l’emprima stagiun far il pass en ils playoffs cun l’equipa HCD Ladies. Perquai sto l’equipa davent da l’entschatta far puncts. Cunquai che la liga è era daventada pli stretga tar las dunnas, dependi a la fin da mintga punct. Suenter ina fasa nua cha las giugadras èn vegnidas a s'enconuscher meglier e nua che la trenadra ha pudì emprender d'enconuscher l’equipa è ussa il plaschair grond che la stagiun cumenza.
