Il club da hockey da Cuira fa il pass da la MyHockey League, si en la Swiss League. Quai cun gudagnar la seria da playoff cunter Langenthal cun 3:1. En il gieu decisiv ordaifer a Langenthal han ils Grischuns dentant stuì cumbatter fitg per la victoria. Pir en l'ultim terz ha Cuira sajettà ils dus gols decisivs tar la victoria da 4:2. Igl uschenumnà «game-winning goal» ha Greg Halberstadt sajettà en la 46avla minuta.
Grazia a la victoria en questa seria da quartfinal è l'EHC Cuira suenter 16 onns puspè enavos en la segund auta liga dal hockey svizzer, la Swiss League. Il motiv che gia la victoria en il quartfinal tanscha è che nagin'autra squadra ha fatg la dumonda da licenza per la Swiss League.
Cuira ha gì tut en ils agens mauns
Sco victur da la qualificaziun è Cuira stà il grond favurit en questa seria encunter Langenthal. Ch'els en da principi la meglra equipa, ha er questa seria mussà. Ils dus gieus a chasa han ils Grischuns dominà e gudagnà senza discussiuns (5:0 e 10:0). Igl è dentant er in fatg che Langenthal è in'autra equipa tar ils gieus da chasa. Avant l'agen public dattan ils Bernais cun bler dapli fidanza e curaschi. Uschia han els era pitgà Cuira en il segund gieu da la seria cun 4:2.
Arosa egualisescha la seria
Al segund club grischun da la My Hockey League, Arosa, gartegia in return en la seria da best-of-5. Cun la victoria da 4:1 cunter Seewen pon ils Grischuns egualisar la seria sin 2:2. Uschia decida la davosa partida da la seria, il mardi proxim sche Arosa u Seewen cuntanscha ils playoff mezfinals da la My Hockey League.
