Il club da hockey da Tavau n'ha betg laschà grondas schanzas ad Ajoie ch'è a la fin da la tabella e gudagnà sia davosa partida avant ils playoffs cun 4:1. Il HCD terminescha la runda da qualificaziun sin plazza sis e frunta uschia en ils quartfinals dals playoffs sin Losanna, il terz da la tabella.
In ulteriur duel da playoff è entant era gia decis: Berna frunta sin Zug.
Tschellas partidas da playoff dependan dals resultads ch'i dat en ils gieus da play-in. En l'emprima runda da play-in frunta Ambri sin Lugano e Genevra gioga cunter Bienna. En tut datti duas rundas. Las partidas da play-in han lieu tranter ils 7 da mars ed ils 13 da mars. Ils playoffs cumenzan alura ils 17 da mars.
Tavau e Berna van direct en ils playoffs
En la segund davosa runda da la National League van il HCD ed il SCB per il ticket direct – per ils playoff quartfinals. Tavau ha gudagnà cunter il victur da la qualificaziun, ils ZSC Lions cun 4:2. E Berna ha fatg in 4:1 cunter Losanna.
Per Tavau ha la partida a chasa cunter ils Lions cumenzà mal. Suenter 6 minutas eran ils Grischuns gia cun dus gols en retard. Il segund terz ha lura il HCD sajettà ils gols – duas giadas tras Dennis Rasmussen ed ina giada tras Dominik Egli. Duas minutas avant la fin da la partida han ils Lions lura prendì il goli giu dal glatsch, e Joakim Nordström ha nizzegià quai cun far il 4:2 final en favur da Tavau.
