Cun questa medaglia d'argient a la pli impurtanta cursa da l'onn encurunescha Ginia Caluori sia grondiusa stagiun. La giuvna da Panaduz è gia stada trais giadas sin il podest da la cuppa mundiala ed è vegnida l'entschatta zercladur davos Ronja Blöchlinger vice-campiunessa svizra a Crans Montana. Avant bun in mais era Caluori lu anc vegnida 5avla al campiunadi d'Europa en il Portugal, lura dentant stada be la terza meglra svizra davos Ronja Blöchlinger sco segunda e Noëlle Buri sco terza.
Impressiuns da la cursa da Ginia Caluori
-
Bild 1 von 8Legenda: da san. Ginia Caluori (2.), Samara Maxwell (1.) e Ronja Blöchlinger (3.) Keystone -
Bild 2 von 8Legenda: Keystone
-
Bild 3 von 8Legenda: Keystone
-
Bild 4 von 8Legenda: Keystone
-
Bild 5 von 8Legenda: Keystone
-
Bild 6 von 8Legenda: Keystone
-
Bild 7 von 8Legenda: Keystone
-
Bild 8 von 8Legenda: da san. Ginia Caluori (2.), Samara Maxwell (1.) e Ronja Blöchlinger (3.) Keystone
Las Svizras U23 han briglià
Davos la Grischuna Ginia Caluori ha cun Ronja Blöchlinger in'ulteriura svizra gudagnà bronz. La Bernaisa ch’era vegnida als davos campiunadis mundials avant in onn a Les Gets en Frantscha anc 5avla ha pers 1:27 minutas sin la nova campiunessa mundiala Samara Maxwell da la Nova Zelanda. Blöchlinger è stada ditg sin posiziun 2. Pir sin las davosas duas rundas ha ella stuì laschar vargar e scappar sia collega d’equipa Ginia Caluori ch’ha la finala gudagnà suveran il cumbat per argient. Sin aur han mancà a la Grischuna 1:01 minutas.
Cun Noëlle Buri sco 6avla ha anc ina’ulteriura svizra persvadi en questa cursa da las dunnas U23. Ella ha manchentà ina medaglia per bun ina minuta.
Gia en la cursa dals umens sut 23 onns vevi dà ina medaglia per la Svizra. Dario Lillo ha gudagnà bronz. Il Grischun Janis Baumann dad Igis è vegnì 10avel.
PREVISTA: Ginia Caluori ha en mira ina medaglia
La mountainbikera da Panaduz vala dasper Ronja Blöchlinger sco il segund grond trumf svizzer en la cursa da cross-country da las dunnas U23. Omadus partan cun grondas ambiziuns en questa pli impurtanta cursa da la stagiun.
Ginia Caluori ha cumenzà pir avant paucs onns a far cursas da mountainbike. Ma en sia categoria sut 23 onns tutga la giuvna grischuna da 20 onns gia tar ina da las meglras dal mund. En questa stagiun è Caluori era gia stada intginas giadas sin il podest da la cuppa mundiala.
La sportista da Panaduz ch'aveva lantschà ina carriera da skis è pronta per la cursa als campiunadis mundials a Glasgow. Ella haja era pudì trenar e sa preparar bain sin questa cursa. Tranter auter è Caluori stada en la Toscana ad in camp da trenament cun la naziunala svizra nua ch’ella ha er pudì trenar cun las dunnas d’elita enturn Jolanda Neff, Alessandra Keller e Sina Frei.
Janis Baumann vul mussar in exploit
Er en la cursa dals umens U23 è in Grischun a la partenza, Janis Baumann d'Igis. Suenter che sia stagiun n’ha betg cumenzà sco giavischà ha il giuven mountainbiker da 21 onns gist anc chattà la furma per il punct culminant, la cursa dals campiunadis mundials en Scozia. Baumann na tutga betg tar ils favurits da medaglia, la finamira saja però da cuntanscher in plaz tranter ils top 10.
La cursa dals umens d’elita cun Janis Baumann cumenza il venderdi a las 12:30 uras, quella da las dunnas U23 cun Ginia Caluori a las 16:30 uras.