En la Scozia charreschan ils autos da la vart sanestra, empè da kilometers vegnan las distanzas inditgadas cun miles, enstagl da gervosa vegn bavì whisky ed enstagl da la crema da sulegl vegn il pli savens duvrà il paraplievgia.
Vid questas midadas han era ils reporters dad RTR, Andreas Wieland e Dominik Hardegger, stuì s'endisar ils emprims dis als campiunadis mundials da ciclissem a Glasgow e conturn.
La citad da Glasgow vivia dentant, manegia Andreas Wieland. Igl haja bler traffic e blera glieud sin via, oravant tut blera glieud giuvna. E Glasgow ch’è il center da quests campiunadis mundials, è er la pli gronda citad da la Scozia cun radund 650’000 abitantas ed abitants. Ins chatta quatter universitads, blers pubs e restaurants cun ina cuschina internaziunala – e plinavant ha Glasgow er ina gronda purschida culturala cun numerus museums, teaters, galarias d’art e salas da concert.
Ina spassegiada tras la citad da Glasgow per emprender ad enconuscher la citad nua ch'ils campiunadis mundials da ciclissem han lieu. Muettas, velos e murals èn be intginas chaussas ch’ins vesa.
Ils Scots aman ballape, dentant ....
A Glasgow ha era il sport tradiziun, cunzunt il ballape cun ils clubs Celtic Glasgow ed Glasgow Rangers. Quai èn dus clubs cun ina gronda rivalitad. Dasper s’interesseschan ils Scots principalmain era per il sport da rugby.
In dals stars en la scena da sport en la Scozia deriva dentant dal ciclissem, Chris Hoy. L’anteriur ciclist sin pista u en halla è numnadamain daventà sis giadas campiun olimpic ed indesch giadas campiun mundial. Ed el ha schizunt survegnì avant intgins onns da la regina Elisabeth II il titel sco Sir Chris Hoy.
