Albstadt, bun 60 kilometers en il nord dal Lai da Constanza, è l’emprima da sis staziuns da la cuppa mundial da questa stagiun. Avant in onn aveva questa cursa stuì vegnir stritgada pervia da la pandemia da corona. Mathias Flückiger è uschia il davos ch’ha gudagnà il 2019 la cursa da cross-country en Germania. Avant aveva Nino Schurter triumfà trais giadas en seria. En il chalender da la cuppa mundiala figurescha er Lai che po beneventar ils megliers mountainbikers dal mund la fin d’emna dals 4 e 5 da settember.
Nino Schurter vul in ulteriur record
Cun ses prest 35 onns tutga Nino Schurter tar ils seniors en la scena da mountainbike. Ma anc adina tutga il mountainbiker oriund da Tersnaus tar ils gronds favurits. Ina finamira è da rumper quest onn il record da la legenda franzosa Julien Absalon ch’ha gudagnà tut en tut 33 cursas da la cuppa mundiala. Per vegnir sin 34 mancan a Schurter anc duas victorias.
E gugent gudagnass Nino Schurter anc in’ulteriura medaglia, sia quarta, als gieus olimpics da questa stad a Tokyo. Mo tut quai che suondi saja oz in supplement, di Schurter che na fa anc nagins patratgs da terminar sia carriera. El haja anc divers contracts fin il 2022. A partir dal 2023 saja pussibel ch’el midia lura forsa in zic il focus e sa concentreschia dapli sin cursas da maraton e cursas d’etappas sco per exempel il Cape Epic.
Vital Albin per l’emprima giada cun l’elita
Suenter ils onns da success en la categoria d’U23 parta Vital Albin quest onn per l’emprima giada en la categoria d’elita, pia cun ils megliers dals megliers da la cuppa mundiala. Uschia po el er cumbatter l’emprima giada ad Albstadt cunter ses idol ed anteriur vischin da Tersnaus, Nino Schurter. Sco uffant haja el adina persequità questas cursas d’elita, e dad esser uss sez ina part da quella categoria saja simplamain grondius, di Vital Albin.
Malgrà ses mo 22 onns fiss sia finamira da sa qualifitgar gia en ses emprim onn tar l’elita per il campiunadi d’Europa ed il campiunadi mundial. Ina gronda finamira, damai che la Svizra ha in’entira massa buns atlets che cumbattan per quels pèr plazs da partenza. Sper il sport studegia Vital Vital dapi bun in onn giurisprudenza, in studi ch’el fa davent da chasa.
Andrin Beeli vul morder fin la davosa secunda
Il mountainbiker da Sagogn è partì cun sentiments maschadads vers Albstadt. Malgrà ch’Andrin Beeli ha pudì far in ulteriur pass enavant e la furma constat, n’èsi betg ì sco giavischà en sias emprimas cursas da la stagiun, quai er perquai ch’el haja fatg intgins sbagls individuals che n’avessan betg dastgà capitar, uschia il mountainbiker da 26 onns. Tranter auter haja el, gist tar l’emprima cursa dal Swiss Bike Cup a Leukerbad, sa decidì per il fallì material, per ils fallids pneus.
Er sche la vita sco sportist professiunala saja diraglia, na cedia el betg. Il fieu per quest sport brischia anc adina ed el saja pront da dar tut, tant en il trenament sco er en mintga cursa. Gugent sa participass Andrin Beeli quest onn a la cursa da maraton dal campiunadi mundial l’entschatta october sin l’insla Elba en l’Italia.
Sper il trio cun Nino Schurter, Vital Albin ed Andrin Beeli va anc in quart Sursilvan, in quart Rumantsch a la partenza a l’emprima cursa da la cuppa mundiala ad Albstadt, numnadamain Ursin Spescha da Sevgein. Partenza per la cursa cross-country dals umens d’elita è la dumengia, ils 9 da matg, a las 14:35 uras. Gia a las 11:20 uras stat sin il program la cursa da las dunnas d’elita cun tranter auter Jolanda Neff e Sina Frei.
