Vital Albin ha cuntanschì in plaz sut ils top 10 tar l'emprima cursa dal Swiss Bike Cup da questa stagiun. A Leukerbad è il mountainbiker da 22 onns vegnì 7avel en la cursa d'elita dals umens. Sin il victur, l'Englais Thomas Pidcock, ha il mountainbiker da Tersnaus pers bunamain 5 minutas. L'auter Sursilvan, Andrin Beeli da Sagogn, ha pers bun 10 minutas e stuì sa cuntentar cun il 32avel plaz. Meglier svizzer è stà il Tessinais Filippo Colombo sco 5avel.
Il giuven talent Thomas Pidcock ha triumfà a moda suverana. El ha battì il Franzos Titouan Carod per passa trais minutas. Sco terz cumplettà il podest ha il Canadais Sean Fincham. Betg a la partenza èn stads ils dus gronds trumfs Svizzers, Nino Schurter e Matthias Flückiger.
Er nagin podest svizzer tar las dunnas
Tar las dunnas d’elita ha Jolanda Neff manchentà in plaz da podest a Leukerbad. Ella è sco meglra svizra vegnida 5avla. Gudagnà ha la giuvna austriaca Mona Mitterwallner, quai senza discussiun avant l'Americana Kate Courtney e la Franzosa Pauline Ferrand-Prévot, l'actuala campiunessa mundiala.
La proxima cursa dal Swiss Bike Cup 2021 è la fin da matg a Gstaad en il chantun Berna. Ils 26 e 27 da zercladur stat sin il program dal Swiss Bike Cup ina cursa a Savognin en il Grischun Central.
