Nino Schurter è adina stà en la gruppa da testa. La finala ha el pers il sprint final encunter ses actual pli grond rival, il Brasilian Henrique Avancini che gudogna uschia questa cursa sin l’insla Elba. Cumplettà il podest sco terz ha il Franzos Maxime Marotte, in ulteriur mountainbiker da la cuppa mundiala. Schurter e Marotte han pers duas secundas sin Avancini.
3 Svizzers sut ils top 10
Ina buna prestaziun ha er mussà Andri Frischknecht, il collega d’equipa da Nino Schurter. Il figl da la legenda Thomas Frischknecht ha pers trusch ina minuta ed è vegnì 6avel. Cun Matthias Stirnemann sco 10avel ha anc in ulteriur Svizzer cuntanschì in plaz sut ils top 10.
Ils dus Grischuns Janis Baumann dad Igis ed Andrin Beeli da Sagogn èn vegnids 15avel (+ 2:03) e 24avel (+ 5:26).
Tar las dunnas ha l’Americana Kate Courtney gudagnà cun in avantatg da 25 secundas sin la Taliana Chiara Teocchi. Cumplettà il podest sco terza ha Caroline Bohé dal Danemarc.
Gia la proxima fin d’emna va Nino Schurter puspè a la partenza, lura a Nals en il Tirol dal Sid.