Il segund di dals European Youth Olympic Festivals (EYOF 2025) a Bakuriani en Georgia procura Lara Bianchi per l'emprima medaglia d'aur per la delegaziun svizra. La Svizra è ida cun 73 atlets a quels gieus olimpics per talents giuvens tranter 14 e 18 onns che sa mesiran en total otg disciplinas. En tut èn 90 atletas ed atlets da 45 pajais a quest event.
Lara Bianchi declassescha la concurrenza
En il slalom gigant parta Lara Bianchi cun il numer 1. Ed ella resta sin l'emprim plaz enfin a la fin. Era sche pulit gnervusa, sco la skiunza da 16 onns raquinta, è surtut l'emprim percurs gartegià a moda suverana. Ella vegn en l'arrivada cun in avantatg da passa 1 secunda.
Jau hai gì in plan – dar vollgas – ed i ha funcziunà
Era en il segund percurs fa ella il svelt temp e gudogna a moda suverana la medaglia d'aur. Il pli grond success en sia carriera anc giuvna. Ina medaglia che saja la pajaglia per blera lavur e trenar e star vidlonder e glimar vid il siemi profi da skis e desister da bler.
Cun ceremonia da fluras e da medaglias sco tar ils gronds
Lara Bianchi è impressiunada da l'entir event. Da la blera glieud, dals inscunters cun atletas ed atlets dad auters pajais. Abitar en il vitg olimpic (ella parta la chombra cun sia buna amia Minna Bont da Lai, ch'ha terminà il slalom gigant sin il 7avel plaz), l'entira ceremonia da medaglias cun il imni, l'entira organisaziun e l'atmosfera. Els sajan era in team perfetg, che sustegnia in l'auter.
Ina medaglia cun bleras emoziuns e plaschairs. Mes geniturs a chasa a Sursaissa han franc gì larmas dal plaschair
Quest di dad aur, ses di dad aur, ha ella per ina giada na betg pudì parter cun sia famiglia. Lezza n'ha betg fatg il lung viadi fin a Bakuriani en Georgia. Ma la festa gronda spargnia ella e fetschia lura a chasa, raquinta Lara Bianchi ch'è era commuventada da las massa reacziuns, gratulaziuns e messadis ch'ella ha survegnì via ses telefonin.
-
Bild 1 von 5. Il podest dal slalom gigant EYOF 2025 cun Lara Bianchi e sia medaglia d'aur. Bildquelle: Swiss Olympic.
-
Bild 2 von 5. En l'arrivada sa legra l'entir team da la medaglia d'aur. Bildquelle: Swiss Olympic.
-
Bild 3 von 5. Il medem di cura che la Sursilvana ha gudagnà aur ha l'Engiadinaisa Nina Cantieni gudagnà bronz en la loipa sur 5km classic. Bildquelle: Swiss Olympic.
-
Bild 4 von 5. Sco tar ils profis. La fotografia da l'entir team na d'astga betg mancar. Bildquelle: Swiss Olympic.
-
Bild 5 von 5. Era la «flower ceremony» datti al EYOF avant ch'i dat lura la saira la ceremonia cun la surdada da medaglias. Bildquelle: Swiss Olympic.
Ina sesiun fin uss perfetga
Che Lara Bianchi è en il ravugl dals talents giuvens a quests gieus olimpics ch'han lieu mintga dus onns èn ses fitg buns resultats en questa stagiun. Tranter auter cun ils titels da campiunessa svizra U18 en il slalom gigant ed en la cursa rapida. Ed en la categoria U21 ha ella gudagnà argient en quellas duas disciplinas. Als EYOF 2025 n'èsi forsa betg stà sia ultima medaglia. I spetgan anc duas cursas da skis sin Lara Bianchi. Il slalom e l'event da team.