Nina Cantieni è ina da gist intginas giuvnas passlunghistas e passlunghists engiadinais ch’èn da la partida quests dis als gieus olimpics europeics da giuventetgna en Georgia. Il festival è mintga dus onns ed è per passa 2'000 atletas ed atlets giuvens en la vegliadetgna da 14 enfin 18 onns in emprim punct culminant en lur carrieras.
Gia mardi passà ha la giuvna da 17 onns gì success als gieus. A la cursa da passlung sur tschintg kilometers en il stil classic gudogna la giuvna bronz. La sonda suonda il triumf en sia disciplina da parada. Da moda e maniera suverana ha la giuvna passlungista grischuna gudagnà la medaglia dad aur. La passlungista da Samedan aveva gia gudagnà tut las cursas, da la qualificaziun, sur il quartfinal fin al final.
Ina buna prestaziun en il sprint ha er mussà Saskia Barbüda dad Ardez. Ella è crudada or da la decisiun en il mezfinal ed ha terminà il sprint sin plazza 9. Lina Bundi da San Murezzan è vegnida 15avla.
Percurschì durant l’entira cursa che i marscha
Nina Cantieni ha 17 onns e deriva da Samedan. Ensemen cun ulteriuras duas curridras da l’Engiadina, numnadamain Saskia Barbüda dad Ardez e Lina Bundi da San Murezzan, è ella ida a la partenza da la cursa sur 5 kilometers en il stil classic. E gia a l’emprima partenza ha quai tanschì per la medaglia da bronz. Nina Cantieni ha percurschì ch'i va bain davent da l’entschatta e ch’ella riva da procurar per in bun resultat sche tut va si. E la cursa è ida si tenor plan. Emprima cursa, emprima medaglia. Per la giuvna passlunghista va in siemi en vigur.
Jau ma sun sentida bain, il currer ed il material ha funcziunà bain durant la cursa.
En la medema cursa nua che Nina Cantieni è ida per la medaglia da bronz, èn las ulteriuras Engiadinaisas Lina Bundi e Saskia Barbüda curridas sin las plazzas set ed otg.
A la tschertga dal proxim talent da passlung
Il Minisguard ha mussà il 2022 Nina Cantieni al sprint da giuventetgna a Samedan, ina cursa en il rom da Maraton da skis engiadinais e nua che inqual talent giuven croda en egl.