Campiunadi svizzer U16 a Breil - L'indigena Lara Bianchi triumfescha

Or da vista indigena, regiunala e rumantscha ha il campiunadi svizzer dals U16 cumenzà perfetg cun in'atleta il pli sisum il podest e l'autra sin il 5avel plaz. Lara Bianchi da Sursaissa triumfescha e vegn campiunessa svizra en la disciplina super-G. Pia Veraguth da Vuorz vegn 5avla. Per la medaglia d'aur, en l'emprima da trais cursas da quest campiunadi svizzer da skiunzas e skiunzas sut 16 onns, èsi stà in crimi ed in cumbat da tschientavels. Lara Bianchi gudogna cun in avantatg da trais tschientavels sin la favurita ch'è partida cun la numra cotschna da la leadra, Juliette Fournier dal Vallais e 10 tschientavels avant Ellie Lauquint dal chantun Vad.

Impressiuns da l'emprim di da cursa

Plaschair, cumbinà cun squitsch e gnervusitad

Entant che Lara Bianchi ha surtut gì sentiments da plaschair avant la partenza a sia pli emprima cursa dad in campiunadi svizzer U16 raquinta Pia Veraguth ch'ella saja anc mai stada uschè gnervusa avant ina cursa. Quai haja gia cumenzà la saira avant il super-G, sia disciplina preferida. Il privilegi che quest event naziunal è en patria, en ses territori, nua ch'ella ha emprendì dad ir cun skis leventa speranzas cumbinadas cun squitsch. Facturs ch'igl è stà d'empruvar da laschar da la vart a la partenza per restar focussada e reussir.

Suenter l'emprima trumpada da ses 5avel plaz e na sco sperà ina medaglia, è la finala era Pia Veraguth cuntenta cun il cumenzament da quai campiunadi svizzer. Duas disciplinas spetgan anc la fin d'emna, il slalom gigant ed il slalom. Disciplinas che Lara Bianchi è quest enviern adina stada en il ravugl da las spertas a cursas naziunalas ed interregiunalas. La nova campiunessa svizra dal super-G na fa dentant nagin squitsch, ir bain cun skis e lura guardar tge che sa resultia.

Aura impedescha ulteriur program

Las temperaturas miaivels e la plievgia han laschà patir la pista da cursa. Suenter ch'ins ha il venderdi stuì desister sin il super-G dals mats sut 16 è la giuria da Swiss Ski ensemen cun ils coachs da las federaziuns da skis dals divers chantuns sa radunanda per guardar co vinavant. Cunquai che la previsiun da l'aura va surtut la sonda da pir en mender, è vegnì decidì da stritgar tut las ulteriuras cursas da quest campiunadi svizzer U16 en il territori da skis da Breil-Vuorz-Andiast.