Karoline Bråten Guidon - Prim onn scheffa da las dunnas da passlung – cun inqual sfida

Quest’emna ha Karoline Bråten Guidon barattà ils skis da passlung cun material da biro: sesidas, analisas da la stagiun passada e las selecziuns per la stagiun che vegn. Quai èn las lavurs che occupan la trenadra da las dunnas da l’elita da passlung curt avant che finir la stagiun. La FMR ha vulì savair dad ella co che questa emprima stagiun saja stada.

Karoline Bråten Guidon è creschida si tranter e cun passlung. Ses bab, l’Engiadinais Giachem Guidon, era passlunghist en la cuppa mundiala. Sia mamma, Anita Moen da la Norvegia, ha gudagnà trais medaglias olimpicas per la Norvegia. Era Karoline Bråten Guidon ha ramassà experientschas sco atleta sin nivel internaziunal. Ella è currida l‘onn 2018 als campiunadis europeics per il team dad atletica ligera da la svizra il maraton. Il siemi dals gieus olimpics a Tokyo ha ella dentant gì da dar si pervia dad ina blessura. Parallelamain tar sia carriera sco atleta ha Karoline Bråten Guidon era studegià e fatg las scolaziuns necessarias, ch’i dovra per daventar trenadra sin in aut nivel. Dapi l’onn passà è ella la manadra dal team da las dunnas dad elita tar Swiss-Ski. Ses um Erik Bråten Guidon è daventà il medem temp schef tar ils umens da passlung. Els stattan ensemen en vischinanza da Tavau, nua ch’i lavuran er ensemen.

FMR: Vus essas gist da return da las cursas da la cuppa mundiala a Lathi en la Finlanda. Essas gia pronta per far in pèr dis vacanzas?

Karoline Bråten Guidon: Na, anc betg dal tut. Uss avain nus anc in pèr sesidas. Nus stuain analisar la stagiun passada, quai è impurtant da far gist curt suenter la stagiun. Lura stattan las selecziuns sin il program e tut la lavur da biro. Quai vul dir circa trais dis sun jau en biro, e lura giain nus questa fin d’emna als campiunadis svizzers. E propi la finiziun da la stagiun è noss champ da primavaira, che nus passentain si la Norvegia.

È quai ina casualitad che Vus manais Voss team si la Norvegia?

Gea, dad ina vart vulevan nus far il champ en ina regiun, nua che nus eran magari segirs dad avair anc bunas cundiziuns era l’entschatta d'avrigl e da l’autra vart essan nus vegnids envidads da l'organisatur da la cursa da passlung dal Peter Nordhug. Là han las atletas ed ils atlets la schanza da gudagnar anc in pèr raps – e nus pudain suenter la cursa passentar anc in pèr dis ensemen e giudair da far passlung.

Co è quai insumma sco figlia da dus uschè enconuschents sportists, ha quai gì ina gronda influenza sin Vus?

Quai è adina stà in tema cura che jau era pli giuvna ed era cura che jau era sezza activa. Quai n’era betg adina simpel per mai. Ma uss sa la glieud qua en Svizra natiralmain tgi che mes bab è ed jau emprov da prender quai positiv. El era propi in grond atlet ed è anc adina fitg interessà al sport. El è noss pli grond fan. Ma uschia sco era en autras famiglias na chat jau betg adina simpel sche tuts han il sentiment ch’ils uffants surpiglian simplamain la fatschenta da lur geniturs. Jau chat ch’igl è impurtant che mintga uffant po decider sez tge via ch’el vul ir. E perquai accept jau che la glieud sa da tgi che jau sun, ma jau fatsch independentamain mia lavur.

Podcast Profil

In’ura cun biografias, destins, istorgias ed experientschas da giuven e vegl ch’han da dir u da raquintar insatge.

Ulteriurs audios e podcasts

Alura analisain nus pli gugent Vossa emprima stagiun sco scheffa da las dunnas da l’elita. Vus avais gì in'entschatta magari difficila, ina da las curriduras, Nadine Fähndrich e ses frar n’han betg vulì star tar Vus en il team ed èn restads cun l'anteriur trenader. Avais Vus tuttina pudì s’etablir en il team?

Suenter restructuraziuns e nova glieud en in team èsi adina in zic difficil enfin che tuts han puspè chattà lur posiziuns. Or da mia vista ha quai en sasez funcziunà bain. In avantatg è segir stà che nus stain era a Tavau ed jau hai perquai savens vesì las atletas che stattan era qua e quai ha gidà per emprender ad enconuscher, da chattar las rollas e da construir in team.

E co vesi ora cun la bilantscha sportiva?

L’entschatta da la stagiun avain nus gì in zic bregia, là n’era jau betg propi cuntenta cun las prestaziuns. Nus avain gì in pèr cursas qua a Tavau, ma be sin nivel naziunal e quai n’è betg il medem per las curriduras. Ils emprims success èn alura vegnids cun il Tour de Ski e suenter è il team daventà pli ferm enfin als campiunadis mundials. Là avain nus gì fitg bels success. Jau ma giavisch simplamain per la stagiun che vegn, che nus vegnian pli spert en in ritmus da bunas prestaziuns.

Per che Voss team saja pront per ils gieus olimpics?

Gea precis, uss suenter trais medaglias e plirs resultats en ils top sis als campiunadis mundials èn las aspectativas natiralmain pli autas che l’onn passà cura che nagin spetgava insatge da las Svizras.

Augmentan quellas aspectativas a las atletas er il squitsch sin Vus sco trenadra?

Mia lavur èsi, ensemen cun il team, da far tut quai che nus pudain per che las atletas possian mussar lur meglras prestaziuns. Ma per mai èsi era grev avant ina partenza, e per exempel uss a Trondheim n’hai jau insumma betg durmì bain, jau era fitg gnervusa ed hai era gì il sentiment che jau na possia betg pli gidar en quest mument a mias atletas. Sco skerz hai jau era ditg a las curriduras che jau sun gnervusa per tschintg ed ellas ston be guardar per sasezzas. Il punct è quel che jau sai be precis quant dir che las preparativas èn stadas, sin tge che las atletas han tut desistì e nua ch’ellas han mess lur prioritads e perquai bad jau schon era, al di x in profund giavisch en mai ch’i funcziuna per mintga curridura da mussar sias meglras prestaziuns.

Vus vivais propi per il sport, tuttina sche Vus essas l’atleta u sche vus essas la trenadra – vegn quai forza anc da Vossa uffanza – per quai che Vus essas creschì si cun geniturs fitg sportivs?

Gea, jau sun creschida si en il mund da sport, jau na ma pudess betg metter avant da viver senza avair da far insatge cun sport. Quai è simplamain mia vita, che jau part uss era cun mes um, Erik. Nus stain en vischinanza da Tavau ed i va en sasez adina per il sport, per las atletas ed ils atlets, quai è fitg impurtant per nus. Sch’i na va betg bain ad ina da mias atletas, mentalmain u fisicamain, alura fa quai bunamain era mal a mai. Jau n’hai betg sezza uffants, ma met avant che quai è in sumegliant sentiment dad avair questa premura.

E co vesi alura ora cun Vossa vita privata? Pudais Vus insumma discurrer sur dad insatge auter che passlung?

Nus avain adina puspè discussiuns, cura che nus badain, che nus avain discurri puspè ina giada plirs dis be sur da passlung, atlets ed atletas e Swiss-Ski. Alura prendain nus avant da discurrer sur dad auters temas e da tschentar giu in zic cur che nus essan a chasa. Ma il medem temp avain nus simplamain era gust da quest tema. E lura bad’ins era muments curt avant ina gronda occurrenza, per exempel curt avant ils campiunadis mundials era quel tema fitg preschent. Ma uss suenter, stoss jau er admetter che mias battarias èn magari vidas. Era mia vusch è magari mediocra. Uss suenter il champ da finiziun, las analisas en biro e las selecziuns essan nus madirs per duas, trais emnas vacanzas. Nus sperain da pudair giudair in pèr bellas emnas en la Norvegia cun amis e famiglia, e sche pussaivel senza telefonin.