Nov schef passlung e biatlon daventa uschia Rafael Ratti da Madulain. L’Engiadinais da 41 onns mida a partir dal matg da la Federaziun Swiss Snowsports, nua ch’el è stà manader per la scolaziun, tar Swiss Ski. Rattì è sez stà anteriur passlunghist ed ha fatg part al cader B da Swiss Ski. Suenter avair terminà la carriera ha el studegià scienza da moviment e sport, pli tard lura lavurà durant trais onns sco trenader per la Federaziun da skis dal Principadi dal Liechtenstein ed era per Swiss Ski.
La nova posiziun sco schef dals passlunghists e biatlets giuvens surpiglia Gion-Antieni Maissen, oriund da Trun. Maissen ch’ha 40 onns è stà fin l’atun 2023 manader da la sparta scolaziun tar Swiss Ski.
Suenter che l'actual schef biatlon Lukas Keel aveva gia communitgà ch’el bandunia Swiss Ski per la fin da la stagiun, vegn era Lars Brönnimann a bandunar la Federaziun da skis svizra. El è stà dapi l’atun 2022 il schef da passlung.