- Mathieu van der Poel vegn per l’emprima giada campiun mundial en ina cursa da velo da via e gudogna uschia aur a Glasgow.
- Il grond favurit ollandais gudogna solo, quai malgrà ch’el è crudà bun 16 kilometers avant l’arrivada.
- Il podest cumpletteschan Wout van Aert da la Belgia (2.) e il Sloven Tadej Pogacar (3.).
- Stefan Küng vegn sco meglier svizzer surprendentamain 5avel.
Radund 20 kilometers avant l’arrivada procura Mathieu van der Poel per la decisiun. L’Ollandais attatga e vegn da scappar da ses davos concurrents. Paucs kilometers pli tard ha l’Ollandais però anc ina giada stuì tremblar da realisar ses siemi. En ina storta andetga è van der Poel glischnà ora e crudà per terra.
Malgrà in defect vid in chalzer, in tricot stgarpà ed intginas nodas blauas vegn Mathieu van der Poel da cuntinuar sia cursa ed puspè augmentar l’avantatg a la testa. A la fin ha il grond favurit triumfà cun in avantatg da 1:37 minutas sin ses pli grond rival Wout van Aert. Van der Poel è uschia l’emprim campiun mundial ollandais dapi 38 onns. Per il spezialist da ciclissem champester e dals gronds classichers da velo è quest titel il pli grond success da la carriera.
Paucas secundas davos Wout van Aert gudogna Tadej Pogacar la medaglia da bronz. Il Sloven ch’era vegnì segund quest onn al Tour de France ha battì en in sprint final Mads Pdersen da la Belgia.
Küng amez la crème de la crème
Davos ils gronds favurits procura Stefan Küng per ina surpraisa. Il ciclist dal chantun Turgovia ch’ha en emprima lingia absolvì questa cursa sco preparaziun sin la cursa cunter l’ura ha pudì restar ditg sin ils chaltgogns als favurits. Grazia ad ina buna davosa runda tras la citad da Glasgow terminescha el la cursa sco 5avel cun in retard da 3:48 minutas. Mauro Schmid ha pers 5:50 minutas ed ha sco 13avel manchentà be per pauc in plaz sut ils top 10.
Spectacul pur en la Scozia
La cursa da 271 kilometers cun partenza ad Edinburgh ha sco spetgà procurà per grond spectacul. Gia suenter bun 80 èn ils radund 200 ciclists vegnids franads entras activists dal clima ch’han cun ina demonstraziun bloccà la via. La cursa ha stuì vegnir neutralisada per bunamain in’ura. A quest mument era a la testa ina gruppa da 9 ciclists, quai cun in avantatg da bunamain set minutas. Cura che la cursa è puspè vegnida dad libra ha questa gruppa pudì parter cun quest avantatg sin la gruppa principala.
Mo paucs cuntanschan l'arrivada
A Glasgow, suenter bun 130 kilometers, è la cursa lura vegnida lantschada per propi. Las 10 rundas à 14,3 kilometers tras la citad da Glasgow cun bleras stortas andetgas han procurà per gronda tensiun e per in grond spectacul. Divers cun-favurits, tranter quels Jasper Philipsen da la Belgia ed ils Franzos Julian Alaphilippe e Christoph Laporte han stuì sutterrar il siemi d’ina medaglia gia passa 100 kilometers avant l’arrivada. Er il leader svizzer Marc Hirschi era da quai temp gia distanzià. Il Bernais ha la finala dà si la cursa sco blers auters. Dals total bunamain 200 ciclists han sulet 51 cuntanschì l’arrivada.
PREVISTA - Marc Hirschi: «Jau vi daventar campiun mundial»
Dapi il 1998 ed il titel d’Oscar Camenzind spetgan ils fans da velo sin in campiun mundial svizzer en la cursa da velo da via. A Glasgow en la Scozia survegnan sis ciclists svizzers la schanza da midar quai, i fiss nairas uras. Sco leader e quel cun las meglras cartas va Marc Hirschi a la partenza.
Avant trais onns è Marc Hirschi gia stà ina giada fitg datiers al titel. Ad Imola en l’Italia er’il Bernais vegnì terz davos il Franzos Julian Alaphilippe e Wout van Aert da la Belgia. Dapi lura spetga Hirschi dentant sin in exploit. Sa gidar cun Hirschi vul tranter auter er Stefan Küng che metta lura ses focus sin la cursa cunter l’ura. L’auter Svizzer cun schanzas da medaglia è Mauro Schmid.
La Belgia en la rolla da favurit
Ils gronds favurits derivan da la Belgia. Dasper il defensur dal titel Remco Evenepoel èn quai Wout van Aert e Jasper Philipsen ch’ha gudagnà quest onn gist quatter etappas da sprint al Tour de France. Durant che la Belgia ha in problem da luxus è la rolla da leader reglada cleramain tar las autras naziuns. L’Ollanda metta tut las cartas sin Mathieu van der Poel che vala medemamain sco in dals gronds favurits. Cumbatter per il titel vul er il Sloven Tadej Pagacar ch’è vegnì segund al Tour de France davos Jonas Vingegaard dal Danemarc che manca a Glasgow sco er il Sloven Primoz Roglic ed il supertalent englais Tom Pidcock.
Cursa fitg pretensiusa
La cursa da via dals umens cumenza en la citad principala dad Edinburgh e finescha en il center da Glasgow. A Glasgow han ils ciclists anc d’absolver 10 rundas a 14,3 kilometers tras la citad, rundas cun bleras stortas andetgas. Tut en tut spetgan 270 kilometers cun radund 3'600 meters differenza d’autezza.