Las meglras atletas ed ils megliers atlets da freestyle sin aissa e skis sa mesiran dals 17 enfin ils 30 da mars 2025 en las disciplinas da slopestyle, mesa pipa, big air, cross, slalom e slalom gigant parallel, aerials e moguls e cumbattan per medaglias e titels da campiun e campiunessa mundiala. Las concurrenzas han lieu sin la Corviglia sur San Murezzan, a la schanza olimpica da San Murezzan e sin il Corvatsch visavi Silvaplauna. En tut datti 28 decisiuns da medaglias en 15 disciplinas. Ils organisaturs fan quint cun radund 1'200 atletas ed atlets da tut il mund e millis visitadras e visitaders.
Concurrenza: as participai e gudagnai tickets dal di
Cun la resposta correcta ed in zic fortuna avais Vus la schanza da gudagnar bigliets per las concurrenzas dals 29 da mars 2025. RTR regala duas giadas dus tickets dal di. Buna fortuna! La concurrenza finescha ils 21 da mars 2025, suenter vegnan las victuras u ils victurs contactads.
Il program dals campiunadis mundials da freestyle
Qua chattais ils puncts da program nua ch'i dat concurrenzas da medaglias. Als ulteriurs dis datti anc trenaments e qualificaziuns en las differentas disciplinas.
Sper las concurrenzas sportivas datti enturn ils campiunadis mundials differentas occurrenzas sco per exempel concerts.
Las disciplinas
-
Bild 1 von 7. skicross. Quatter skiunzas u skiunzs surmuntan uschè svelt sco pussaivel in percurs cun schanzas, undas e curvas. Bildquelle: Freestyle-WM 2025.
-
Bild 2 von 7. snowboardcross. Las concurrenzas da snowboard- e skicross èn sin la Corviglia, sur San Murezzan. Bildquelle: Freestyle-WM 2025.
-
Bild 3 von 7. Moguls. Sin ina pista da bots sa mesiran las skiunzas ed ils skiunzs. Bildquelle: Freestyle-WM 2025.
-
Bild 4 von 7. Aerials. Aut en l'aria vai tar la disciplina aerials. Atletas ed atlets mussan trics cun saltos e struvas e vegnan valitads. Bildquelle: Freestyle-WM 2025.
-
Bild 5 von 7. snowboard alpin. Pli svelt che l'adversaria u l'adversari emprovan ils snowboardists alpins da far il percurs. Bildquelle: Freestyle-WM 2025.
-
Bild 6 von 7. big air. Trics sin la schanza gronda fan las snowboardistas ed ils skiunzs da freestyle en il big air. Bildquelle: Freestyle-WM 2025.
-
Bild 7 von 7. mesapipa. Sin ils skis e sin l'aissa fan las atletas ed ils atlets trics en la mesapipa, questa occurrenza è sin il Corvatsch. Bildquelle: Freestyle-WM 2025.
Construir e far tests
Avant ch'ils campiunadis mundials da freestyle pon avair lieu han ils organisaturs construì ils implants e testà quels. La Federaziun internaziunala da sport (FIS) pretenda che tut las disciplinas vegnan manadas atras avant ils campiunadis mundials. Perquai hai dà ils dus envierns passads differentas cursas e concurrenzas sin il stgalim da la cuppa mundiala, quai per testar ils process e l'infrastructura. Uss è tut pront per che l'Engiadin'Ota po daventar in Mecca da freestyle.
