Cun la davosa concurrenza ha l’equipa Svizra decidì il spievel da medaglias tar ils campiunadis mundials da freestyle en l'Engiadina. Grazia a la davosa medaglia dad aur da Noé Roth tar la concurrenza d’acrobatica ha la Svizra las pli bleras medaglias d'aur ed è uschia la meglra naziun da freestyle dal mund.
Tschintg giadas aur, ina giada argient e trais giadas bronz
Quai è la bilantscha da medaglias ordvart positiva da l’equipa tar quests campiunadis mundials. Sa chapescha che las tschintg medaglias dad aur da Ryan Regez, Fanny Smith, Mathilde Gremaud, Noé Roth e da Regez e Smith sco team glischan il pli ferm. Dentant han er las medaglias d’argient e da bronz da Sarah Höfflin da Pirmin Werner e da las equipas dad aerials (Werner, Kozomara e Roth) e boardercross (Jud e Siegenthaler) ina gronda impurtanza e mussan che l’equipa svizra na viva betg mo dad in sport sco il skicross, dentant da plirs. Ed exact quai è er stada la motivaziun dals organisaturs da prender ensemen tut ils sports e da mussar che la Svizra è ferma en pliras disciplinas.
Ils buns resultats da l’entira equipa Svizra suttastritga precis quai. Suenter diesch dis da spectacul da freestyle en l'Engiadina ha l’equipa svizra persvadì. Atletas ed atlets grischuns han dentant trumpà tar ils agens campiunadis mundials. Dad els avess’ins senza auter era pudì spetgar ina u l’autra medaglia.
Victurs e victuras svizras als campiunadis mundials
-
Bild 1 von 6. Fanny Smith e Ryan Regez. Bildquelle: Keystone.
-
Bild 2 von 6. Noé Roth e Pirmin Werner. Bildquelle: Keystone.
-
Bild 3 von 6. Sarah Höfflin. Bildquelle: Keystone.
-
Bild 4 von 6. Mathilde Gremaud. Bildquelle: Keystone.
-
Bild 5 von 6. Pirmin Werner, Lina Kozomara e Noé Roth. Bildquelle: Keystone.
-
Bild 6 von 6. Valerio Jud e Sina Siegenthaler. Bildquelle: Keystone.
Organisaturs tiran bilantscha positiva
L'organisaziun dals campiunadis mundials da freestyle 2025 èn cuntents cun ils resultats da las duas emnas plain exploits sportivs. Quai tenor il CEO Milan Derouck. Radund 100'000 aspectaturs ed aspectaturas èn stads a guardar las occurrenzas en ils territoris da skis Corviglia sur San Murezzan e Corvatsch sur Silvaplauna.
Ils concerts avessan pudì vertir dapli visitaders e visitadras
L'emprima fin d'emna dals campiunadis cun concerts da bands internaziunalas avess tenor il CEO pudì esser visitada meglier. L'organisaziun n'ha betg vendì uschè blers bigliets, la plazza da festa tar la schanza olimpica dador San Murezzan è stada plitost vida. Quai saja dentant sa midà la segunda fin d'emna, quella da finiziun. Durant quella è la plazza da festa stada emplenida bain, di Milan Derouck. Cifras exactas n'ha el dentant anc betg. El è dentant cuntent ch'ins haja pudì festivar la finiziun dals campiunadis mundials da freestyle a buna moda.
Ils resultats sportivs dals campiunadis mundials da freestyle en l'Engiadina en survista
Themen in diesem Newsticker
- Noé Roth è siglì il meglier, Primin Werner è terz en ils Aerials
- Melville Ives è il meglier en la mesapipa
- Zoe Atkin è megliera dal mund en la mesapipa
- Argient per Sarah Höfflin en il Big Air
- Naginas medaglias en la halfpipe per la Svizra
- Isabelle Lötscher siglia sin plazza 10
- Snowboardcross-mixed: Bronz per Siegenthaler e Jud
- Festival giapunais al Big Air
- Svizra senza medaglias da snowboardcross
- Mesapipa: quartet svizzer fa part als finals da snowboard
Sper las concurrenzas sportivas èn ils campiunadis era stads ina sfida organisatorica, han dà la chaschun a blers da survegnir ina invista en in mund che n'è uschiglio betg uschè preschent ed igl ha era da blera musica e shows.
Tge impressiuns ch'ils uffants da la scola primara da Zuoz han dals campiunadis, quants stortins e quant bler café ch'ins ha duvrà per atlets e voluntarias chattais en l'artitgel sut. Plinavant raquinta era Cla Mosca da las entschattas dal sport da snowboard ed ins survegn in'impressiun co la mesapipa vegn preparada per las concurrenzas.
Freestyle talks cun atlets ed atletas
«Co vai?» en il mund enturn freestyle
