Per Talina Gantenbein n'hai er questa giada betg propi vulì gartegiar per in podest. Dentant è ella cun il 5avel plaz tuttina arrivada sco megliera Svizra en l'arrivada. Sco ella ha ditg en l'intervista cun SRF spera ella sin las proximas duas cursas ch'èn anc avant Nadal ch'i tanscha lura forsa per in plaz da podest. Era Fanny Smith (7avel rang) e Saskja Lack (8avel rang) èn tranter las nov meglieras dunnas dal di.
Persvadì han las Canadaisas. Marielle Thompson gudogna la cursa da skicross. Quai è gia la 33avla victoria da la cuppa mundiala da skis per Thompson. Era il segund e terz rang han duas Canadaisas suprì: India Sherret sin il segund plaz e Hannah Schmidt sin il terz plaz.
Fiva croda or en quartfinal
Tar ils umens ha il grischun Alex Fiva be cuntanschì il quartfinal ed è lura crudà ora. Il meglier Svizzer è stà Ryan Regez ch'ha cuntanschì il rang 6. Grond vicutur dal di èn dentant stà las Canadaisas ed ils Canadais. Reece Howden ha fatg l'emprim plaz tar la cursa da skicross dals umens. Igl era ina victoria fitg stretga: La fotografia mussa che Howden arriva gist curt avant ch'il Talian Simone Deromedis sur la lingia d'arriv.
Sco l'Engiadinaisa Talina Gantenbein ha ditg avant las cursas, saja ella adina fitg gugent ad Arosa, tranter auter perquai ch’ella ha festivà là si’emprima plazza da podest. Spezial saja er che la famiglia possia mintgamai vegnir a guardar las cursas.
Jau sun adina fitg gugent ad Arosa.
Dapi che l’atleta da 26 onns fa cursas da skicross en la cuppa mundiala ha ella dumagnà sis giadas sin il podest, trais giadas l’ultima stagiun. La nova stagiun da skicross ha cumenzà la fin d’emna passada en Val Thorens en Frantscha. In cumenzament grategià – Talina Gantenbein è vegnida quarta. L’ultima stagiun è stada la pli ferma e la pli constanta da l’atleta da Scuol. Dasper las plazzas da podest è ella regularmain sa classada en il ravugl da las top 10. Ses potenzial è enorm, da quai èn ses trenaders persvadì. Ella n’haja simplamain anc betg pudì clamar giu propi dal tut quel. Atgnamain fiss il temp madir per sia emprima victoria en la cuppa mundiala. Quest mument arrivia, è Talina Gantenbein persvadida:
Jau speresch adina puspè che quel di arriva tar la proxima cursa. Ma, jau ma sent propi fitg bain, mes corp funcziuna tiptop. Uschia pens jau che quest di arriva anc.
La nova stagiun da skicross daventa magari speziala. Il mars è il campiunadi mundial en Engiadina, a San Murezzan. Ina medaglia è cler la finamira. Quest campiunadi mundial da chasa è sa chapescha cumbinada cun in pau squitsch, era squitsch mental. Ma Talina Gantenbein vul uss sa focusar sin la cuppa mundiala ed actualmain sin las cursas da skicross ad Arosa.
Ed er sa qualifitgà per las cursas ad Arosa è Alex Fiva. Per lez ha la stagiun da skicross cumenzà fitg ferm la fin d'emna passada en la Val Thorens en Frantscha – cun gudagnar ina da las duas cursas. Il skicrosser da Cuira ha pudì festivar sia 14avla victoria en la cuppa mundiala. E quai là, nua che Fiva ha avant dus onns stgarpà ils lioms cruschads dal schanugl e manchentà in'entira stagiun.
Quai n'è atgnamain betg la megliera cursa per mai ad Arosa. Dentant èsi cool a chasa e la notg, uschia ch'jau ma legrel.
