Talina Gantenbein, cun success dal ski alpin al skicross
Entschet ha la carriera da la giuvna oriunda da Scuol tar il ski alpin. Il 2016 ha ella dentant scuvert il sport da skicross. Ina amur a prima vista, ed en retrospectiva in midament che ha valì la paina. Gist en sia emprima stagiun ha la giuvna da 22 onns pudì festivar sia emprima medaglia d’aur, quai tar ils gieus olimpics da giuvenils a Lillehammer en Norvegia.
Schebain che Talina Gantenbein vala dapi lura sco ina da las meglras skicrossistas svizras, sin medaglias tar l’elita ha ella dentant stuì spetgar enfin questa stagiun. Ad Arosa ed ad Idre Fjäll lura finalmain la paja meritada – duas giadas va Talina Gantenbein sin il podest e daventa terza. Resultats che dattan schlantsch e motivaziun, betg mo per las ultimas duas cursas da la cuppa mundiala da quest onn, mabain oravant tut era per la proxima stagiun, cul punct culminant per mintga sportista e sportist – ils gieus olimpics.
Giulia Tanno – ina carriera tranter spital e medaglias
Giulia Tanno è da chasa sin ils podest da Big Air e Slopestyle en la scena da freeski. La skiunza da 22 onns va sco grond talent en il team svizzer. Ella è dentant er da chasa en chombras da spital e sin maisas d’operaziun. Numerusas sguladas han schon chaschunà ruttadiras. Giulia è in'atleta plain nattas, struvas da fier.
Schon cler! Sche jau fiss ina atleta da passlung u tennis na fiss jau stada uschè bler sin maisas d’operaziun. Freeski è mes sport! Adrenalin è mia passiun!
Uschia tutgan er adina puspè trenaments da reabilitaziun tar la carriera sin skis. Suenter ina sgulada durant il trenament als X-Games ad Aspen en ils Stadis Unids fin schaner è Giulia Tanno turnada cun in bratsch rut. Cunquai è la stagiun a fin per la giuvna skiunza. La proxima sfida suenter la reha è dentant schon en mira. La stad entschaiva il trenament per ils gieus olimpics da Peking.