Alex Fiva, il skiunz da skicross grischun, ha da magunar ina terrada tar la davosa cursa da la stagiun ad Idre Fjäll en Svezia. Enstagl da gudagnar la culla da cristal da la cuppa mundiala generala è Fiva crudà ora gia en il quartfinal. Gudagnà la cursa ha il Svedais David Mobärg. Mobärg va cunquai era cun la culla da cristal da la cuppa mundiala generala.
Ferma Sixtine Cousin
En la davosa cursa da skicross da la stagiun da las dunnas è la Svizra Sixtine Cousin vegnida quarta ed ha cunquai manchentà il podest be per pauc. Cousin ha entant gì paucas schanzas en il final cunter sias concurrentas.
Gudagnà la cursa da las dunnas ha la Canadaisa Marielle Thompson. Ella ha da medem temp era gudagnà la cuppa mundiala generala ed uschia la culla da cristal.
