Curdin Räz da Segl ha 25 onns e sia gronda passiun è il passlung. Ses siemi da pitschen ensi è da pudair viver dal sport professiunal. Per realisar quel siemi, è il Segliuot pront d’investir bleras uras sin la loipa.
Cumbinaziun da sport e lavur
Sper las diversas uras da trenament lavura el d’enviern numnadamain sco maschinist e prepara las loipas enturn Silvaplauna. La cumbinaziun da lavur e sport è ina gronda sfida. Numnadamain cumenza ses di la damaun a las 4:00 e savens datti dis da lavur da var dudesch uras. Mintga fin d’emna absolva el cursas da la seria internaziunala da Ski Classics. Per il sport professiunal n’è quai betg ideal, causa ch’i manca il temp da recreaziun. Tuttina è Curdin Räz sa decis per questa via e sias prestaziuns dattan ad el la motivaziun per far vinavant.
