Etappa 5 – Malgrà in defect ina finiziun sco giavischada
Er in defect, ina platta bun 8 kilometers avant la fin, n'ha betg pli pudì franar il «Team RTR». Andi e Coni termineschan il Swiss Epic 2024 sco 12avels en la categoria «Mixed». Tut en tut è il «Team RTR» stà sin viadi 26:39.21 uras durant las 5 etappas dal Swiss Epic ch'ha manà da La Punt en l'Engiadina a Tavau cun in stop a Cuira.
Ils davos meters avant l'arrivada sajan stads bellezza cun savair ch'ins haja dumagnà questa cursa che vala sco ina da las pli diras cursas da mountainbike insumma, uschia Andi e Coni curt suenter avair retschavì la medaglia sco «finishers» dal Swiss Epic, il frar pitschen dal Cape Epic en l'Africa dal Sid.
Nus essan leds e loschs che nus avain dumagnà quai ed engraziaivels per tut las experientschas che nus avain fatg durant questa cursa.
Suenter l'etappa finala da 62 kilometers cun 2450 meters d'autezza en la regiun da Tavau han Andi e Coni festivà lur prestaziun cun in vinars. La saira ha emprim spetgà ina buna tschaina en buna cumpagnia e lura hai anc dà a la «Swiss Epic After Party» a Tavau in sa vesair cun ils ulteriurs participants da questa cursa extrema, bikers da l'entir mund.
Resultats e rangaziun
Etappa 4 – In di perfetg da Tavau a Cuira
Il venderdi saja stà in «super di», ha ditg noss redactur Andreas Wieland suenter la cursa: «Jau hai smatgà ora la citrona fin il davos dagut». El saja sa sentì fitg bain fin il davos, dentant saja da Maladers fin il Mittenberg stà fitg pretensius. Er Cornelia Schwarzentruber haja gì in fitg bun di. Els armoniseschian adina meglier ensemen, ha ella ditg. Dentant sajan els leds che la sonda saja il davos di, perquai che mintga di vegnia adina pli dir per il corp e cunzunt er las chommas.
L’atmosfera tranter ils participants e las participantas saja fitg buna ed empernaivla, di Andreas. En pli haja el udì ier ch’er Sebastian Vettel saja da la partida. Il Tudestg da 37 onns è vegnì quatter giadas en seria campiun mundial da la furmla 1 en Red Bull (2010, 2011, 2012 e 2013).
Etappa 3 – Team RTR adina meglier en furma
La quarta etappa dal Swiss Epic è stada fin uss la pli ferma dal Team RTR cun Andreas Wieland e Cornelia Schwarzentruber. Il duo ha terminà la cursa en la categoria «Mixed» sin plazza 11. Grazia a quella buna prestaziun ha l’equipa fatg il pass enavant en il classament general da la categoria maschadada sin plazza 12.
En il classament general da l’entira cursa è il Team RTR uss rangà sin plazza 136. La sonda spetga anc l’ultima e davosa etappa sin ils participants e las participantas dal Swiss Epic. Cun start ed arrivada a Tavau maina quella 62 kilometers enturn il lieu.
Ed en il decurs da l'avantmezdi para quai d'avair funcziunà. Per il traject da 64 kilometers dovran el e Cornelia Schwarzentruber 4 uras e 43 minutas. En il decurs da la cursa han els pudì far bun intgins rangs. Els èn sin plazza 143 dal classament general. En lur categoria – mixed – èn els suenter la terza etappa sin plazza 14.
Etappa 2 – L'etappa roiala sur il Pass dal Scaletta
La damaun n'era Andreas Wieland anc betg stà uschè optimistic ch'el po la segunda etappa dal Swiss Epic. L'emprim di ha el numnadamain gì problems cun il flad ed er la bun'ura n'è el anc betg stà dal tut fit. Tant pli cuntent è el suenter questa cursa roiala, «declerar na sai jau betg quai» daco che la cursa è ida uschè bain questa giada. Ma tuttina, er questa cursa saja stada dira. Er Cornelia Schwarzentruber ha sa sentì bain durant la cursa. Els hajan omadus questa giada pudì parter en meglier las forzas ed il temp. Cuntanschì ha il «team RTR» il plaz 144 da La Punt fin Tavau.
Etappa 1 – Betg ina partenza ideala
L'emprima etappa dal Swiss epic 2024 saja stà diraglia, di Andreas Wieland suenter la cursa. El ha patì direcziun Corviglia. Ma ensemen ha il team RTR pudì morder e dumagnà l'emprima etappa. L'arrivada han els cuntanschì suenter 5:22.6 uras.
Igl è stada la 11avla ediziun dal Swiss Epic ch'aveva gì sia premiera il 2014 en il Vallais. Dapi il 2019 vegn questa cursa pretensiusa manada tras en il Grischun.
«Team RTR» a la partenza
Il «Team RTR» sut la marella
Surnum
Coni
Data da naschientscha
29 da november 1981
Grondezza
164 cm
Domicil
Kaltbrunn SG
Professiun
policista
Mia filosofia da viver
Mintga di ina buna acziun
Musica preferida
pop e house
ChueLee, la band da mes frar Martin
Mes film preferì
Die Tribute von Panem
Mes animal preferì
giat
Mia cifra preferida
11
Mes pli grond idol
mes bab
Mias pli bellas vacanzas
Canada
3 chaussas che jau hai gugent
- pommes chips
- mia giatta «Diva»
- famiglia ed amis
3 chaussas che jau odiesch
- fritgs da mar
- levar baud
- fom
Mia finamira al Swiss Epic da quest onn
Dumagnar cun plaschair sin cools trails l'arrivada.
Andi è ...
... mes accumpagnader preferì sin bleras bellas turas cun velo da muntogna e cun velo da cursa
Surnum
Andi
Data da naschientscha
2 da favrer 1981
Domicil
Panaduz
Professiun
schurnalist da sport
Mia filosofia da viver
Na siemia betg tia vita, mabain viva tes siemi
Musica preferida
pop, rock e classic.
Johannes Oerding, chantadur da pop e songwriter tudestg
Mes film preferì
Die Verurteilten cun Tim Robbins e Morgan Freeman
Mes animal preferì
tigher
Mia cifra preferida
12
Mes pli grond idol
Nino Schurter e Rafael Nadal
Mias pli bellas vacanzas
viadi tras il vest da l’Australia
3 chaussas che jau hai gugent
- filippo, ina spezialitad ord la cuschina da mia mamma
- vin cotschen da l’Africa dal Sid
- tschigulatta
3 chaussas che jau odiesch
- nunpunctualitad
- dischurden
- tomatas
Mia finamira al Swiss Epic da quest onn
Cuntanscher l’arrivada da la 5avla e davosa etappa a Tavau, quai cun in surrir e senza blessuras.
Cornelia è ...
... durant il temp liber quasi mo sin il velo, e quai senza cunfins. Mental fitg ferma ed adina da buna luna.
Coni ed Andi – «Ti u Jau»
Armonia, tenor determinaziun «... ina proporziun equilibrada tranter parts, ina cun l’autra» – vala quai era tar Coni ed Andi, noss gladiaturs da bike?
Tgi è pli gnervus avant ina cursa? Tgi lascha plitost si la chapellina en l’ustaria? Tgi è pli adattà per il circus? Las 11 dumondas ed anc dapli respostas èn da chattar en il «Ti u Jau».
5 dis – 341 kilometers – 11'450 meters ensi - 12'600 meters engiu
Durant tschintg etappas han participantas e participants en mintgamai teams da dus gì d’absolver passa 340 kilometers cun radund 11’400 meters d’autezza. L’etappa roiala ha spetgà il segund di. Lura è vegnì bandunà l’Engiadina direcziun Tavau, in’etappa sur 81 kilometers cun 2'550 meters ensi. Questa etappa ha manà tranter auter sur il Pass dal Scaletta, cun 2'606 meters sur mal il pli aut punct dal Swiss Epic 2024. La quarta etappa ha manà quest onn da Tavau en la chapitala grischuna a Cuira, in’etappa cun 3'350 meters descensiun. A fin è il Swiss Epic – sco ils davos onns – ì a Tavau.
| Data | Etappa | Profil |
| 20-08-2024 | La Punt – La Punt | 76 km / 2'150 m d'autezza |
| 21-08-2024 | La Punt – Tavau | 81 km / 2'550 m d'autezza |
| 22-08-2024 | Tavau – Tavau | 64 km / 1'950 m d'autezza |
| 23-08-2024 | Tavau – Cuira | 62 km / 2'400 m d'autezza |
| 24-08-2024 | Tavau – Tavau | 61 km / 2'350 m d'autezza |
Victurs dal Swiss Epic 2014-2024
Umens:
- 2024 – Gian Schmid (Svizra) / Lukas Flückiger (Svizra)
- 2023 – Martin Stosek (Tschechia) / Marc Stutzmann (Svizra)
- 2022 – Fabian Rabensteiner (Italia) / Daniel Geismayr (Austria)
- 2021 – Nicola Rohrbach (Svizra) / Lukas Flückiger (Svizra)
- 2020 – Nino Schurter (Svizra) / Lars Forster (Svizra)
- 2019 – Fabian Rabensteiner (Italia) / Michele Casagrande (Italia)
- 2018 – Matthias Stirnemann (Svizra) / Andri Frischknecht (Svizra)
- 2017 – Daniel Geismayr (Austria) / Jochen Käss (Germania)
- 2016 – Lukas Flückiger (Svizra) / Reto Indergand (Svizra)
- 2015 – Mathias Flückiger (Svizra) / Lukas Buchli (Svizra)
- 2014 – Lukas Buchli (Svizra) / Mathias Flückiger (Svizra)
Dunnas:
- 2024 – Monica Calderon Martinez (Columbia) / Tessa Kortekaas (Pajais Bass)
- 2023 – Vera Looser (Namibia) / Kimberley Le Court (Mauritius)
- 2022 – Bettina Janas (Germania) / Adelheid Morath (Germania)
- 2021 – Ariane Lüthi (Svizra) / Robyn de Groot (Africa dal Sid)
- 2020 – Haley Batten (Stadis Unids) / Annika Langvad (Danemarc)
- 2019 – Adelheid Morath (Germania) / Bettina Janas (Germania)
- 2018 – Haley Smith (Canada) / Catharine Pendrel (Canada)
- 2017 – Esther Süss (Svizra) / Jennie Stenerhag (Svezia)
- 2016 – Jolanda Neff (Svizra) / Alessandra Keller (Svizra)
- 2015 – Adelheid Morath (Germania) / Sally Bigham (Gronda Bretagna)
- 2014 – Annika Langvad (Danemarc) / Ariane Kleinhans (Africa dal Sid)
